好人好事｜攀樹師午飯現金不足 豪氣老闆一句「得啦」變相八五折 網民：好多老闆表面好惡其實好好人
香港營商講求準確，食飯結帳少一元都可能「出唔到門口」。攀樹師馬學銘周六與同事們在油麻地一間中菜館，享用合共233元的午餐，結帳時獲老闆語氣堅定地告知「淨係收現金」，可是一行人均沒有足夠的現金，情況一度陷入尷尬。馬學銘其後從銀包掏出兩張100元鈔票，心想「大鑊，點算？」未料老闆一手奪去鈔票並稱「得啦」，馬學銘愕然追問「點得呀？」，再被老闆再補一句「得啦。」
▼事件緣由及網民留言逐格睇▼
網民：好鐘意呢啲粗聲粗氣得嚟又好親切嘅對話
馬學銘事後在社交平台分享事件，提到之後回應「我下次嚟俾返你」，老闆卻硬朗地回應「唔好講呢啲」。他直言「活咗30幾年，真係未見過咁樣嘅老細」，又讚揚老闆是豪氣之人，「又好人、又細心」。他晚上完成工作後，更專誠返回店舖還錢和請老闆飲啤酒。從其張貼的帳單可見，一行人共享用兩個燒味雙拼飯、一個咖哩牛腩飯和一個常餐，共消費233元；收少33元即等同大約八五折。
有網民分享類似的店舖好人好事經歷，有人在銅鑼灣一間老字號豆品廠消費約五十多元，結帳時始發現銀包只有10元現金，店員遂對他說「出去慢慢再撳返返嚟啦，唔緊要㗎」，更指已經試過兩次，讚揚店員很好人，難得信任他不會藉詞離開走數，「真係好窩心。」有留言就欣賞這類情懷，「好鐘意呢啲粗聲粗氣得嚟又好親切嘅對話，香港特色嚟」、「好多茶餐廳老闆表面好惡，其實好好人，好多時帶唔夠現金，都叫你下次比翻佢」、「呢啲咪人情味。以前，好多餐館都係咁，唔夠錢埋單，可以收少啲。細個都試過，下次幫襯時，叫返多嘅嘢食，比返多啲貼士。」
不少網民誤會帖文批評老闆
此外，帖文開首以「痴×線 香港點解會有呢啲老細」為題，導致不少網民都誤會事主正在真心批評店舖，有人留言為事主澄清，「而家啲人閱讀理解係咪差成咁，樓主暗讚緊老闆口硬心軟有人情味都俾人鬧」、「睇留言覺得好多人好蠢」、「點解一篇表揚文會變咗閱讀能力分水嶺」、「睇到一半終於明樓主想表達d(啲)咩，不過香港人的溫柔真係唔係個個明」、「睇留言就反映到部分香港人為鬧而鬧。」
▼夏天飲冰水迷思▼
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)