大欖現巴士迷大遷徙 多人衝出公路影巴士 警方到場驅趕引熱議

近日接連發生巴士迷為拍攝巴士而衝出馬路的事件，行為危及自身及他人安全，屢遭網民批評。周二（15日）再有片段於網上流傳，畫面可見約20名年輕巴士迷在大欖青山公路一帶肆意企出公路影相，其間被兩名交通警員驅趕，場面有如「大遷徙」。

片長約32秒的影片所攝時間未明，畫面中可見一眾少年巴士迷手持相機及長鏡頭，從青山公路新大欖段跑往迴旋處，亦有人匿藏橋底。當兩名交警駕駛電單車抵達並響號示警時，部分人驚慌奔走，有人嘻笑互問「我哋係咪要走？」「我哋都無出到去」，亦有聲稱「唔好搞我呀」的對話。片段未有交代最終是否有人遭票控。

事件引發網民激烈討論，不少人狠批行為魯莽、罔顧安全，有人直言：「已經有長炮都仲要出馬路影相」、「越危險地方影得越靚？」亦有駕駛者留言分享經歷：「有次係大棠迴旋處，成班衝出嚟嚇X死我」。

部分網民認為應嚴肅處理：「罰曬班個個$2000就啱啦」、「警察真係要做多啲嘢，而家完全亂晒籠，唔檢控吓啲家長唔會識管理」、「影巴士唔緊要，但唔好咁樣呀，影響人又危險」。

事實上，類似事件已非首次發生。前日（13日），將軍澳亦有大批巴士迷為拍攝期間限定的X797雙層城巴衝出馬路，場面驚險，有巴士車長因憂發生意外而報警。

港新聞Instagram：https://www.instagram.com/kong.news/
港新聞Threads : https://www.threads.net/@kong.news