方力申做爸爸極大感受　揭愛女名字藏家庭密碼

藝人方力申（小方）去年12月宣布愛女Isla出世，同太太葉萱（Maple）升做父母，如今已為人父3個月，極多感受嘅佢決定盡訴心中情，今日（26日）分享同愛女溫馨合照外，大談為女兒改名「愛嘉」背後重大意義。

方力申回顧過去一年結婚生女嘅人生重大轉變，佢坦言似打機咁難度升級，單身時覺得自己生活及工作安穩、成績不錯，但結婚後發現維持感情同實踐一生一世承諾係需要實際行動。自囡囡Isla出世後，佢深刻體會到「養兒一百歲長憂九十九」道理，同太太一同面對各種擔憂與計劃，不過佢都對未來充滿期待，認為結婚生子係將「我」變成「我們」嘅過程。

方力申又詳細解釋愛女中文名由來，早前佢就解釋過英文名Isla，係英文「FAMILY」拆解而成，正正就係佢一家人名字縮寫：F代表方（Fong）、A代表Alex、M代表Maple、I代表Isla、L代表未來嘅BB，Y代表葉（Yip）。而中文名佢選用「愛」字，係因為家中掛有「愛」與「家」書法，象徵家庭係佢生活重心，同時「愛」普通話發音同Isla相近；「嘉」字則由好友陳定幫師傅建議，發音與「家」相同。小方更自爆心思︰「既然中英文意思都咁夾，所以就乾脆叫佢愛嘉啦！Isla 愛嘉，爸爸今日嘅願望就係希望妳能夠一生平安、健康、快樂！（其他就隨緣啦）」

東網網站 : https://on.cc/東網Facebook專頁 : https://www.facebook.com/onccnews/