m18講場：企業利是封創意馬力全開　呢款叫價500元有價有市？

今年農曆新年比往年遲，節日氣氛依家濃烈！各大金融機構、地產商紛紛使出渾身解數，設計靚靚利是封同客戶分享喜悅，一齊睇吓邊款能夠先聲奪人、一馬當先！

滙豐私銀二手叫價500元？

講起利是封設計，花卉最多捧場客！滙豐今年迎來中環第四代總行啟用40周年，總行外型剪影鏤空，映襯內裏牡丹盛開，寓意繁榮昌盛、富貴吉祥、滙瑞豐年！小記喺網上二手市場見到有人叫價500大元，仲見已有售出個案，可謂有價有市。

花旗私銀嗰個都係用朵朵牡丹，百花盛開，更特意用壓印技術，並以金幣點綴其間，呈現高級質感。資產管理公司普徠仕就用大量幾何圖形配成花朵，予人花團錦簇感覺。

瑞聯銀行就用咗傳說中百鳥之王嘅鳳凰，背後有多彩花朵作襯托，兩款設計金、紅色互相配搭。渣打嘅設計就令人目不暇給！鳥、魚、花、草組成一個半圓形，兩封一併更可以組成一個完整嘅圓形。星展私銀就用仙鶴為主題，祝各位新一年鶴立雞群！

時興ESG 馬仔設計愈來愈少？

時興講ESG，選擇「12年先可以重用一次」、以當年生肖為主題利是封嘅本地企業就買少見少，反之，外資公司就有不少捧場客。以投行瑞銀的主角為兩匹駿馬奔馳，配上彩色的牡丹及祥雲作點綴，封底印上「瑞氣盈門．銀春接春」嘅金字。基金管理公司富蘭克林鄧普頓(Franklin Templeton)用幾何圖形呈現馬匹嘅英姿，背面二維碼藏有祝福短片，仲大玩食字「財富密馬」、「馬上好運」。

本地代表嘅港鐵公司就用燙金印刷嘅馬仔，配以花紋印花，夠晒龍馬精神。電子支付巨頭Mastercard就係馬仔插圖，最特別就係圓形設計，兩封放埋一齊就係公司商標，好似提醒大家，派利是要打孖先夠吉利！

卡通人物最受小朋友愛戴

講到「卡通派」，自然唔少得星展銀行嘅「阿星、阿展」，唔經唔覺佢哋就嚟廿歲喇，但一樣咁可愛，封內仲大有乾坤，有燈籠、爆竹等慶年物品印花。富邦銀行吉祥物海瀨家族就全家出動，祝願大家如意吉祥！另邊廂，藍十字就「簡單粗暴」直接用迪士尼動畫《魔雪奇緣》（Frozen），派利是果時一定更深受小朋友愛戴！

地產公司盡顯奢華

地產公司方面，新地旗下樓盤天璽‧天個設計就比較平實，但勝在用料夠扎實，同埋「Cullinan Sky」字樣模仿針織都係一大亮點。新世界九龍塘豪宅新盤滶蘊，就有項目嘅燙金插圖同「PAVILIA ROSA」，可謂簡約風奢華！恒地今年慶祝成立50周年，用咗自己最為代表嘅齒輪商標，配以簡單線條組成大紅燈籠，玩味十足。

嘉華就藝術氣息十足，用書法「馬」字融入設計，另一款就用抽象線條重新詮釋馬嘅形態，夠晒吸睛！建灝旗下豪宅ONE STANLEY就用項目標誌性拱門設計，配合駿馬騰空躍起，寓意新一年「馬躍門庭 福氣盈門」。

東網網站 : https://on.cc/東網Facebook專頁 : https://www.facebook.com/onccnews/