【香港電影金像獎2019】「最佳女配角」惠英紅曾因拖延母病情感內疚 決代入病母腦退化角色以戲贖罪
第38屆香港電影金像獎頒獎典禮剛完滿結束，每年獎典禮都引嚟觀眾嘅熱烈討論，到底各大獎項花落誰家。今屆嘅「最佳女配角」就由影后惠英紅憑電影《翠絲》安宜一角奪得，更係憑該片奪得第二個女配角獎。惠英紅喺戲中飾演一個保守、一切以家庭為重嘅傳統女人，而現實中嘅惠英紅都係一樣，更曾因令病母延醫而感到內疚。
撰文：Kammy｜圖片來源：Facebook，節目截圖
惠英紅再奪金像獎「最佳女配角」
現年59歲嘅惠英紅從影逾40年，一直都拍過唔少出色嘅電影，係本港嘅實力派演員。惠英紅1982年時更憑電影《長輩》奪得首屆香港電影金像獎「最佳女主角」，其後一直奪得多個電影大獎，包括金馬獎「最佳女主角」、香港電影金像獎最佳女主角獎等。而今年惠英紅憑電影《翠絲》安宜一角，第二度奪得「最佳女配角」，可見其演技得到肯定。
惠英紅喺《翠絲》中飾演佟大雄（姜皓文飾演）老婆安宜，係一個十分傳統保守嘅女性，一切以家庭為重，相夫教子係佢嘅終身事業。由於呢段婚姻係由父母同媒人安排，對於老公日趨冷淡，安宜都冇太大抱怨。直到對方提出要離婚並進行變性手術時，安宜震驚到頻臨崩潰，呢一幕絕對係惠英紅大晒演技嘅時候。
惠英紅喺致詞時，除咗多謝班電影團隊之外，更多謝自己，因為佢一直以嚟都好抵諗頭，會支持新導演：「香港電影一定要百花齊放，一定要後生仔，我哋啲老人家賺多賺少唔緊要，我希望可以見到香港電影好似我出道時一年產4百幾部，各式各樣電影，同埋有好多新人」。惠英紅仲話好開心有份出力參與，希望老前輩可多支持年輕人。
惠英紅：希望媽媽會同我講一聲「以你為榮」
惠英紅2017年憑《幸運是我》贏得第三座香港電影金像獎最佳女主角獎，電影講述腦惠英紅患有退化症，希望藉以喚醒大家關注。其實，惠英紅母親亦有患腦退化症，更因病於2016年去世，當時惠英紅奪獎致詞時曾一度在台上淚如雨下：「其實今次點解我咁激動，因為我拍呢套戲其實係想畀我媽咪。我媽咪係有十幾年嘅老人痴呆症，佢之前係癱喺床上﹐連飯都唔食，呢套戲係希望大家可以包容佢哋。」
其後，惠英紅續說：「我上次攞獎係為自己，我今次攞獎係為咗阿媽，畀佢知道我冇丟架。我媽媽啱啱過身幾個月，其實我好希望媽媽會同我講一聲『以你為榮』。媽，我冇丟姓惠嘅架。」
2016年，年屆90、惠英紅母親病逝，當時惠英紅既傷感，但又帶半點釋懷：「親愛的母親，這些年你實在太辛苦了。如今能夠與爸爸在天上相聚，是一種福氣希望你一路好走，爸爸會照顧你的，你的子女個個都佷好，不要掛念我們，好好在天堂享福吧。我們愛你。」
母生前一度病情惡化感內疚
惠英紅當年拍《幸運是我》時，曾透露初頭諗住唔拍呢套戲，因為要演八十歲太老，接受唔到，又覺得冇信心做，但係想拍佢媽咪嘅嘢，因為媽咪五十幾歲已經老人癡呆，但佢哋唔知，蹉跎咗佢好多時間冇幫佢醫病，個關係愈嚟愈惡劣。
惠英紅表示，當時對媽媽好差，唔體諒，淨係覺得佢變得不近人情、好煩、冇責任感，「原來佢係有腦退化症，到佢七十歲有次跌傷，醫生同佢傾偈，覺得佢思維好混亂，話佢係好嚴重嘅老人癡呆，一照完磁力共振，我好震驚，見到佢頭骨好大，個腦得好小，原來因為我無知，唔知佢病冇幫佢、冇體諒佢，好內疚、好自責，因為我哋個年代一路覺得老人癡呆係八、九十歲，冇諗過我媽咪五十歲就開始有，所以今次拍呢部戲，好想拍我媽咪真實嘅嘢，想俾訊息有緣者多啲關注腦退化症呢個病。」
當年惠英紅戲接戲下， 連拍了七部戲，「我唔想咁，但有好嘅劇本唔想放手，有啲今日拍完、明日開新，但我唔俾自己疊期，第一我唔想兩套都唔好，第二我鍾意每個角色都設計到唔同，我唔想影響自己。」
因退化症 學懂包容
被問到後尾同媽咪點關係點，惠英紅指：「佢成日會唔記得嘢，係用忍耐、包容，盡量陪喺身邊，好坦白講，照顧者都係辛苦，因為佢幾分鐘嘅嘢都唔記得，戲入面有一場講電視搖控器嘅衝突，其實係現實中我媽咪同我一條好大嘅刺，我媽咪一日五、六十次叫我開、關電視轉台，但佢完全唔記得幾分鐘前係叫我熄電視，我一行開，佢就嗌晒救命要我嚟開電視，有次我太嬲，忘記咗要包容，開完電視，將搖控器掟向佢身邊，鬧：『你係咪想整死我，我好攰，你究竟俾唔俾我抖？』」
惠英紅續指：「我阿媽突然好委屈、好徬徨，含住眼淚話：「我真係唔記得呀！」我見到，唔敢再糾纏，即刻行開，因為我唔想將件事拖好長，佢會記住，我行開冇耐，我阿媽眼淚都未收，又笑住嗌我開電視，所以我拍嗰場戲專登將個情緒攞番出嚟，呢場戲好多人睇完都喊，但我唔係刻意想人喊，而係真實我當時感覺到我媽咪嗰種徬徨無助，想演繹番出嚟，for訊息又好，for拔番我心中條刺又好。」
孝順女惠英紅指，媽媽生前冇認得任何人，食嘢要灌，更坦言：「如果我早十年知佢個病，可能未至於咁差。」不過，惠英紅媽媽最終都不敵病魔與世長辭，但相信如果惠媽媽見到惠英紅今日嘅成就，都會以佢為榮。