同黃德斌激吻　湯洛雯唔敢畀父母睇

無綫小花湯洛雯（靚湯）及林秀怡出席主演劇集《婚姻合伙人》宣傳活動。席間靚湯自爆早前播出與黃德斌的吻戲，是入行以來最激的一次：「好緊張，拍咗幾take，播出直情唔敢畀父母睇！」

秀怡笑言自己亦有坐定定欣賞靚湯與德斌的「演出」。當提到她與陸永的「鴛鴦戲水」，秀怡笑謂：「最唔明係點解陸永着埋對鞋落水，可能甩色搞到池水變黑，好臭仲要拍足一日，諗番到覺嘔心。陸永拍到當咗我嘅胸同個墊只係一舊肉，拍咗落嚟都冇感覺。」

另外，靚湯原本明天便要投入《法證先鋒IV》拍攝：「因為天雨關係，所以依家改咗去後日。（緊張？）起初有啲，但做咗功課個人定啲，都擔心我好似插班生中途插入，台前幕後已經係一家人嘛。」秀怡在旁笑謂：「咁你要跑快啲追番。」靚湯笑答：「唔好再講跑步嘞，之前我拗咗柴，醫生話左腳韌帶輕微撕裂，頭先玩遊戲都唔敢太投入。」

東網網站 : https://on.cc/

東網Facebook專頁 : https://www.facebook.com/onccnews/