減肥心理學 - 肥又關心理學事？

唔知大家有無聽過JB首歌 -《點解咁X肥》🎤？有聽過嘅可以一路睇呢個post一路留意歌詞，無聽過嘅即刻search 嚟聽聽🎧。
減肥，喺香港幾乎係全人類嘅目標。不論係少男少女👩🏻🧑🏻，定係成年人👨🏻👩🏻‍🦱，大家都希望可以控制體重，令身形變得更加靚。

但係，俗語都有講【減肥無咁易，每舊肉都有佢嘅脾氣】。究竟係乜嘢令減肥難過登天？而心理學嘅角度嚟講，人又點解無啦啦會肥呢？吾係心理學家今次就同大家探討呢個topic！

「點解會咁肥？」🌚

肥，除咗同營養🥦🍳🥐同運動🚴🏻‍♀️🏊🏻‍♂️⛹🏻有關之外，原來同心理學都有好大關係！有好多心理學家都好鍾意研究人類嘅飲食，下面就係一啲常見嘅相關理論。

1. 外部性理論 （Schachter & Goss, 1968)

提出呢個理論嘅學者認為💬，肥胖人士嘅飲食主要由外在因素決定，而唔係因為佢哋本身覺得肚餓。呢啲外在因素可以係野食嘅相、氣味、廣告等等。

當中，有一個因素比較特別，就係時間🕑流逝。每個人心入面都有固定飲食時間，一段時間之後，人就會認為自己需要食嘢。實驗發現，透過欺騙參加者時間過得比真實時間快，呢啲參加者會食嘢多過比人欺騙時間過得比真實時間慢嘅參加者。所以，留意時間都可以係導致肥胖嘅契機。

2. 身心理論 （Psychosomatic theory，Kaplan & Kaplan, 1957)

呢個理論建基於兩個心理學概念，分別係條件學習（classical conditioning）同操作制約(operant conditioning)。
條件學習喺由俄國心理學家 Pavlov 提出，指兩個刺激因素產生聯系，從而引伸出新嘅行為。條件學習導致外界刺激因素同食慾產生咗聯系，所以每逢見到嗰啲外界刺激因素就會想食嘢啦！

至於操作制約就係指透過學習一個行為嘅利弊，而作出行為上嘅改變。有啲人肥胖嘅問題源於依賴用食嘢嚟舒緩焦慮或者恐懼等嘅負面情緒🎭。久而久之成為咗學習效應，不斷透過食嘢嚟舒緩負面情緒。
今次同大家介紹咗，心理學入面我哋嘅諗法同心情都會影響食嘢嘅習慣，導致肥胖，唔知你又同唔同意呢？留言分享吓！

想知多啲，可以睇下面嘅文：

Schachter, S., & Gross, L. P. (1968). Manipulated time and eating behavior. Journal of Personality and Social Psychology, 10(2), 98–106. https://doi.org/10.1037/h0026285

Kaplan, H. I., & Kaplan, H. S. (1957). The psychosomatic concept of obesity. Journal of Nervous and Mental Disease, 125, 181–201.