最令人討厭的Message行為！你中邊幾樣？

自從步入數碼世紀，香港人溝仔溝女再唔係寫紙仔、飛鴿傳書，或者等待深夜靜靜雞用屋企固網電話傾通宵嘅年代。現代大部份嘅溝通方式，都係依靠Send Message為主；雖然今時今日好多小朋友都鐘意玩Snapchat，但講到深度對話，相信Whatsapp/Messenger等等工具依然係不可或缺。

放眼而家嘅戀愛課程，或者係網上示愛攻略，大部份都係教導投其所好、得閒講幾句Flirty嘅說話，最好每句覆短啲、同埋唔好一收到Message就即覆云云。結果每次示愛失敗，你以為只係自己冇跟足指示辦事，又可能純粹遇人不淑，下次一定會成功嘅。真相又邊有咁簡單？

講到底，無論你學咗幾多花言巧語，溝仔/溝女始終係一門溝通技巧。如果你冇辦法令人有興趣繼續同你傾計，話之你腿張開送上門，溝通都係失敗（如果你好靚又腿張開就可以另計，不過我哋今次講緊普羅大眾）。所以，想要同對象開展Topic傾計，首先就要學識避免做Topic Ender。

依我所見，一般人經常會墮入幾個話題終結嘅陷阱，希望你睇完呢篇文之後，從此唔好再中伏：

1. 九唔搭八

想用文字溝仔，最基本嘅條件，就係要對方睇得明你表達嘅內容。無論你用中文定英文，最好確認一下你自己嘅文字符合你想表達嘅意思。如果你都覺得自己講嘢1999，睇你Message嗰個人一定會更加攰。

2. 唔分段、唔分行

鐘意一個人，好容易就會連珠炮發打一大堆字、有乜講乜，完全唔理會Sentence Structure。唔要求每個人都係鄺俊宇，不過如果你能夠將自己嘅思緒好好整理一下，對方就會更容易代入你嘅處境，真正進入同一話題。

3. 過度使用Emoji

今時今日Send Messenger當然唔可以純文字，如果唔加幾個Emoji，對方分分鐘以為你黑面、嬲咗佢。話雖如此，如果每句對話都加Emoji都係一件幾嘔心嘅事，尤其過度使用「微笑」、「笑喊」，或者每一句都加一個「哈哈」結尾……其實真係好虛偽，連「好假的肥仔」都不如。

4. 懶得打字

自從Whatsapp都有埋Sticker，莫講話打字，世人就連語音功能都懶得用，成日就咁撳個Sticker出嚟就當自己覆咗機，以為好幽默，其實係懶到出汁。講真如果個Sticker唔係好關事，好心你就唔好為覆而覆；想溝仔又唔想pay effort，不如返屋企慳啲啦。

5. 「……」

得罪講句，「……」可以話係有史以來最討厭嘅回覆訊息。對方打咗一堆字畀你，無論幾唔啱心意，你可以用各種嘅回應去表示不滿、無奈、憤怒、唔高興、唔同意。但如果你就咁覆一個「……」，咁即係表達啲咩呢？所以如果當我見到「……」，而對方又唔主動再搵我嘅話，呢個「……」就會係彼此嘅最後對話。
祝各位情聖一帆風順！

**Follow us on:

• Facebook: CosmoHK
• Instagram: @cosmopolitan_hk
• YouTube: CosmopolitanHK**