喪屍片《28年後》用智能手機拍攝　捕捉震撼暴力

英國導演丹尼保爾（Danny Boyle）名作多多，除了《迷幻列車》（Trainspotting）與拿下8座奧斯卡小金人的《一百萬零一夜》（Slumdog Millionaire），當然少不了帶動「喪跑喪屍」風格的經典喪屍片《28日後》（28 Days Later）。當年他大膽用輕磅低清數碼相機，拍攝喪屍末日後的倫敦，捕捉到一種獨特的粗糙感，今次他回歸執導第3集《28年後》（28 Years Later），同樣玩出新花款，以智能手機取代電影攝影機進行拍攝。丹尼表示：「用智能手機拍攝，令拍攝隊可以輕便咁移動。作為取景地嘅南蘇格蘭諾森布里亞望落同一千年前差唔多，所以我哋可以好快好輕便咁喺個郊野周圍去，保留嗰種人煙罕至嘅感覺。」

其中部份動作場面，以多部智能手機透過支架排成一個半圓，以不同角度捕捉動作，丹尼解釋：「佢令我哋做到窮人版嘅「子彈時間」（來自《廿二世紀殺人網絡》（The Matrix））鏡頭，我哋用喺暴力場面上，效果好震撼，有時候估唔到咁仔細。」4K高清鏡頭亦將自然環境拍得美輪美奐，丹尼表示：「佢令你拍到大自然嘅美麗，呢樣我哋用嚟對比啲恐怖場面，係好重要嘅一環。」

今集故事是新三部曲的首集，時間發生在首集的28年後，英國本島已經完全淪陷於喪屍瘟疫，被世界遺棄，只有少數人住在隔離的外島。一個喪屍獵人父親（艾倫莊遜（Aaron Taylor-Johnson）飾）帶同12歲兒子（Alfie Williams飾）到本島殺喪屍作為成人禮，然而兒子看到本島疑似還有醫生生還者，於是私自帶走患病的母親（Jodie Comer飾）到本島，希望可以救母。喪屍經過多年演化，除了有「喪跑種」，亦有「慢爬種」，最可怕則是號令其他喪屍的「屍王」，力大無窮，可以徒手將人頭連脊骨拔走！

東網網站 : https://on.cc/東網Facebook專頁 : https://www.facebook.com/onccnews/