雲浩影孖型男拍親密戲　主動出擊攬到實

歌手雲浩影（Cloud）新歌《我們還有幾多時間》早前請來新一代型男Model仲佳佳（Pete）擔任MV男主角，雖然Pete拍過不少MV，但今次應導演要求拍攝跟Cloud鬧交的場面，演戲經驗不多的他，試戲時表現緊張，貼心的Cloud於是要求清場，好讓Pete能夠全程投入拍攝。

《我們還有幾多時間》MV故事講述Cloud與Pete一直希望一起出國進修，奈何只有Pete被校方取錄，不想丟下另一半的他，寧願放棄大好前程，反而Cloud覺得對方想法幼稚，兩人因此意見不合，她說：「MV故事係講我同Pete原本有一個共同目標，突然呢段關係要走到終點、就快要爆炸嘅時候，我要出嚟拆彈，其實好多時，當一對情侶步伐不一致，想追求嘅嘢唔同，男仔個世界就係個女仔，但女仔就想對方再上進一啲，呢個都係好多情侶會面對嘅問題。」

MV中Cloud與Pete有不少擁抱和拖手的親密舉動，但演出經驗尚淺的他明顯緊張，她說：「因為今次MV我哋都有啲親密嘅舉動，都Feel到Pete好緊張，但經過咗一日嘅相處，大家都好開心，希望出來嘅成品好好睇。」拍攝二人拍拖的溫馨場面，拍醜仔Pete未敢隨便觸碰女神，即使是一個簡單的擁抱鏡頭，也要Cloud反過來採取主動說：「我哋係專業嘅演員嚟㗎！」

去到拍攝鬧交戲份，Pete明顯未能完全投入，貼心的Cloud見狀，立即要求清場，當現場二十多名工作人員逐一離開，Pete也開始變得放鬆，終於做到導演的要求，他說：「其實可以再做好啲。」Cloud則鼓勵說：「我覺得你已經做得好好，可能佢第一次做戲，現場又有咁多Crew喺度，會有一定嘅壓力。」

及後Cloud換上拆彈衣繼續拍攝，外形嬌少的她，穿起拆彈衣時難免舉步難行，她說：「呢件衫嘅感覺係非常之笨重，之前拍《密切接觸者》MV時，都有着過一件類似太空衣，件衫係由羽絨同其他布料拼湊而成，所以好保溫，透氣還好，我會努力保持心靜自然涼。」

東網網站 : https://on.cc/東網Facebook專頁 : https://www.facebook.com/onccnews/