羅子溢失視帝不氣餒　趁盆菜宴向同事謝票

無綫一連兩晚在電視城舉行的《TVB職藝員新春盆菜宴2026》昨晚（9日）舉行第二場，筵開超過150席，朱敏瀚有份上台表演唱歌，好友張振朗、周嘉洛和吳業坤期間趁熱鬧衝上台一同合唱《歲月如歌》，炒熱現場氣氛。

張振朗和劉穎鏇早年拍攝《奪命提示》成為螢幕CP，觀眾非常受落，劇集播終至今，他們經常合體拍攝了不少搞笑短片，想保持這模式帶歡樂給大家，希望將來可以再次合作拍劇，張振朗表示：「同劉穎鏇有默契係好事，好耐冇同朱敏瀚和賴蔚玲呢啲死黨一齊拍劇，同朱敏瀚平日日見夜見，對上一套合作的《拳王》都5年前。」劉穎鏇也表示很想4人一起拍劇。振朗女友楊偲泳在社交平台罕有上載與振朗及友人去嘉年華玩，滿載而歸，振朗笑言支持她出Po，覺得是正常事：「過去2025年係開心一年，新一年可以開心吓！大家睇完好開心。（感情事唔再避忌？）不嬲都低調。」女友參演的電影預告片咀爆何啟華，問振朗會否捧場睇？他表示到時就知，並鬆口讚賞楊偲泳：「佢梗係好睇，咁靚女。」至於何時拉埋天窗，振朗表示遲一步先，要拚搏期一段時間，有好消息會公布。TVB主席許濤表示有人工加，他笑言待出糧後再考慮。劉穎鏇聖誕返美國洛杉磯探望屋企人，陪伴老人家好溫馨，她說此行冇艷遇冇相睇，屋企人不關心她有冇拖拍，只關心她何時返美國。

羅子溢在《萬千星輝頒獎典禮》失落視帝，他表示沒有失望，昨晚出席盆菜宴想跟平日少機會見到的同事敍舊及謝票，認為經歴需要累積，慢慢等待時機，會做更多好作品，不會令大家失望：「其實每年自己都表現好積極去拉票，（太太楊茜堯讚你是最好？）老婆講好正常，出於感情，係好窩心，小朋友寫畀我張卡內容好簡單，但睇到係好感動。」他表示與太太盡在不言中，無需特別安慰。他表示將來若有機會同太太合作，想做搞笑角色多些，不想將夫婦感情事公開。透露過年前後都有工作，新劇《枱底》亦快將開工，希望今年可以更多產：「如果現在再做一次《金式森林》相信會再做好啲，遇有新角色會再畀心機去做，等觀眾覺得有分量，到時再等候拉票囉。」自言拍戲不為攞獎，只希望作品達到水平，直言得獎不會驕傲，失獎也不會氣餒，不會視攞視帝為目標，希望得到觀眾認同最重要。

東網網站 : https://on.cc/東網Facebook專頁 : https://www.facebook.com/onccnews/