拎得起隻大象就可以許願成真？泰國必去景點！三象神博物館
去泰國旅行少不免都會入寺廟參觀下，參觀泰國嘅寺廟，見識泰國嘅建築美學同埋了解泰國文化。而除咗佛之外，象都喺泰國人民心目中有重要地位。
今日小編就為大家介紹位於泰國嘅「三象神博物館」，距離曼谷市中心並唔遠。
同一般嘅博物館唔同，三象神博物館唔係泰國政府興建嘅，而係由一名泰國富商出資打造而成，佢起呢間博物館嘅目的係希望可以保留同弘揚泰國傳統藝術文化。
呢座博物館嘅主建築外型非常特別，上半部係純銅片打造而成嘅三頭象，下半部就係粉紅色歐泰式混合建築嘅底座。
雖然係「博物館」，但入面都有祭祀嘅地方，喺主建築外面就有蓮花池供遊客許願，將蓮花放喺水入面漂流，就可以帶走厄運。
博物館設有中文導覽服務，而且係免費，大家喺入去參觀之前記得去攞語音導覽耳機啊！
成座建築分為三個部分，包括係：地宮、人界同天堂。地宮係可以著鞋入內，著短褲短裙亦都唔洗用圍巾圍住下身，但係上到人界同天堂就就記得去借返圍巾喇（免費）！要留意嘅係，地宮展示嘅都係博物館創辦人嘅私人珍藏，當中包括陶瓷、傢俱、神像等，非常珍貴，所以係禁止影相嘅。
而人界就係建築物粉紅色嘅內部，整體都係以粉紅色為主調，由四柱支撐，上面嘅雕刻分別刻咗四大宗教：佛教」、「印度教」、「伊斯蘭教」同「基督教」嘅故事。
人界嘅天花更加係裝上彩繪玻璃，上面畫咗幅世界地圖，向上望嘅時候非常壯觀。
行上樓梯，正中央有一座角亭，入面供奉咗佛教嘅觀音像。人界嘅雕塑都雕刻得非常精細，貼上瓷片，美輪美奐。
沿住柚木梯級往上行就到天堂。天堂中央放置咗一個佛像，而兩邊就擺咗啲石佛像，天堂嘅氣氛非常寧靜、莊嚴。中央佛像前面擺放咗一樽樽「聖水」，只要添啲香油錢就可以攞走。
建築物內外都擺放咗唔少佛像，大家入去參觀完之後可以用門券換領線香同花圈。嚟到三象神博物館，梗係要拜下象神。許完願或者祈完福之後，記得用手指拎起旁邊嘅鑄鐵大象（女性用非慣用手食指，男性用無名指），如果可以單手拎起鑄鐵大象，就代表象神答應你嘅願望喇！
博物館周圍都有大象雕像，建築後面嘅庭園更有各種雕塑，呈現出泰國古典文學以及神話故事入面唔同人物嘅形象。
地址：99/9 M.1 Muang Samut Prakan, Samut Prakan Province, Bangkok, Thailand
門票：400泰銖（9:00-17:00）；200泰銖（17:00-19:00）
官網：http://www.erawan-museum.com/
三象神博物館外型宏偉，而且入面有好多珍貴展品，加上精美嘅雕塑，完全睇得出博物館創辦人想宣傳泰國文化藝術嘅真心啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）