楊千嬅挑戰地獄級粵語急口令　講到條脷打晒結

歌手楊千嬅早前上內地節目《誰是寶藏歌手》，同內地歌手陳楚生合唱《情人》，官方上載影片時，讚千嬅係「神級粵語」，不過有網民就話千嬅喺香港土生土長，唱廣東話歌點會難到佢。唔知係咪咁，千嬅就喺個人影片頻道晒粵語急口令片，到底佢表現成點？

今次千嬅分3級挑戰，首先係入門級「每個國家有各個國家的國歌」，千嬅一Take過，講得字正腔圓。之後輪到進階級「一蚊一斤雞，一蚊一斤龜，究竟係雞貴定龜貴？」以千嬅嘅Level，當然難佢唔到。

最後來到地獄級「出東樓，走六步，碰見六叔同六舅，好六叔，好六舅，借我共斗六升好綠豆，過了秋收了豆，再還給六叔六舅，六斗六升好綠豆」，千嬅即面露難色，心知呢次瀨嘢，佢都硬住頭皮去講，起初都講到好順，點知去到「再還給六叔六舅，六斗六升好綠豆」時，千嬅條脷都打結，好彩都完成挑戰。網民都話其實千嬅已經好犀利，地獄級去到尾仲要講得快而準，唔係人人都可以講到，不如你都試試，睇吓係咪叻過千嬅。

東網網站 : https://on.cc/東網Facebook專頁 : https://www.facebook.com/onccnews/