華哥不專業鞋評 – On Cloudboom Echo 3 | Insports Lab

之前一直試 On 嘅跑鞋都喺一啲慢跑款，未有試過比賽鞋款，今次收到呢對 On Cloudboom Echo 3，有種眼前一亮嘅感覺。

On 嘅第一對碳板跑鞋– Cloudsurfer 喺 2010 年面世，當中有 TPU 同碳纖維唔同物料作為板材。而去到今代，物料上已經進步咗唔少，因為 On 喺推出前已同運動員一齊研發；喺唔同嘅練習、比賽都有亮相過。

鞋面喺用咗一塊高科技嘅編織布料，除咗透氣性高之外，仲好薄。大家唔好以為佢薄就好易爛，其實都好堅挺（一般嘅跑鞋網面如果好薄，都會易爛）。

鞋舌面係一塊好薄、軟嘅薄猄皮薄棉，再喺面上額外加咗兩塊軟薄墊，減低長時間跑步鞋帶對腳背嘅壓力。而鞋帶有啲膠質，係希望增加磨擦力，減少鬆脫嘅機會。而雙層鞋眼設計俾唔同腳背⾼度嘅用家用嚟調節。

⽤咗 Pebax 材料打造最新 Helion HF 超級泡綿⾼性能中底，除咗提供輕盈緩震之外，仲提供極好嘅回彈。而 CloudTec 只喺前面，後面只保留三個細細嘅空間（同慢跑款嘅大粒 CloudTec 好唔同）。

利用三明治結構將全掌碳纖維速度板 Speedboard 放喺兩層 Helion HF 之間，以提升推動⼒。鞋底前掌用咗⼤⾯積橡膠外底，喺離地推進嗰陣提供更好嘅助⼒，後踭關鍵受⼒位置都配置咗輕薄防滑嘅橡膠墊。

一對比賽鞋未必可以捱多過 2-3 場比賽，我相信呢對鞋就可以跑大概 4 場馬拉松，而過咗 4 場賽之後，以佢嚟作為練習鞋都好唔錯。但如果唔係經常比賽，或者未有興趣比賽嘅朋友，就未必建議買呢對，個人覺得反而 Cloudmonster 可能會更好。

運動