潘瑋柏行禮狂抹汗　楊丞琳拖李榮浩去飲晒Deep V

台灣小天王潘瑋柏前日（29日）同「中國最美空姐」宣云（Luna）於印尼峇里島補辦婚禮，尋日就被賓客爆出台灣歌王王力宏、陳妍希、蔡卓宜等都有去，同潘瑋柏情同「兄弟」嘅楊丞琳都帶埋老公李榮浩一齊去飲，賭王千金何超蓮亦有現身，成為網友關注焦點。楊丞琳晒出夫妻同框同一對新人嘅合照，兩公婆又上載同款照片，大晒老公、老婆視角。

而一對新人亦有行禮片段曝光，潘瑋柏同Luna十指緊扣步入儀式場地，由拍拖到結婚都保持神祕嘅潘瑋柏，就突然「社恐」，一路上頻頻咬嘴唇，行到定點時又急忙喺西裝衫袋摷嚟摷去，最後拎出紙巾抹汗，畫面逗趣。

東網網站 : https://on.cc/東網Facebook專頁 : https://www.facebook.com/onccnews/