莊梅岩第七度奪最佳劇本獎：多謝香港孕育自己
（獨媒報導）第31屆香港舞台劇獎頒獎典禮昨晚舉行，舞台劇編劇莊梅岩憑《最後禮物》奪得最佳劇本獎，並由新聞工作者蔡玉玲頒獎。莊梅岩在發言時感謝香港：「好多謝香港呢個城市，過往四十幾年嚟孕育我，我喺呢度先至滿滿咁吸收到能量，同埋希望以後可以繼續貢獻香港嘅劇壇，同埋香港社會。」
由香港戲劇協會主辦的第31屆香港舞台劇獎頒獎典禮，今屆邀請多名嘉賓頒獎，均為其所屬界別的「勇氣代表」，除了蔡玉玲，包括電影導演杜琪峯、何爵天、時事漫畫家尊子、演員楊詩敏及麥沛東等。
蔡玉玲盼寫超現實劇本 「個結果係你寫㗎嘛」
莊梅岩的作品《最後禮物》、《我們最快樂》均獲提名入圍，最後憑《最後禮物》奪得最佳劇本獎，這亦是她第七次獲得該獎項。
大會安排新聞工作者蔡玉玲頒發最佳劇本獎，蔡玉玲早前就車牌查冊後上訴至終審法官勝訴。她在上台時被問到如要撰寫劇本，會寫反映現實或較超現實的劇本。蔡玉玲稱，會毫不猶豫選擇撰寫超現實的劇本：「你哋啲編劇已經咁叻，就好再同記者爭飯食，唔好再寫反映現實嘅嘢。」司儀問到，即使是超現實，是否最終都會是悲劇。蔡玉玲就稱：「個結果係你寫㗎嘛。」司儀稱沒有，並說：「恭喜你同多謝你。」現場隨即傳來拍掌聲。
感謝兩劇台前幕後 信「父兼母職」續撐自己
莊梅岩在發言時稱，不論哪一個劇本獲獎，均希望感謝兩個製作單位、演員，指在疫情中經歷不少磨難，對兩個作品在疫情後能繼續存在是十分幸運，再次感謝台前幕後的工作人員、設計師、演員及觀眾。
由黃子華、潘燦良主演的《最後禮物》，講述原生家庭的兄弟爭奪遺產。被問到在快樂的家庭成長，為何寫了如此黑暗的劇本，莊梅岩指生活在幸福中，更感受到失去的痛苦：「人哋話It takes a village to raise a child，我覺得 It takes a village to raise a play-right too。我所屬於嘅village 即係各位，二十年嚟喺呢個戲劇界，朋友裡面，我哋工作人員，大家都俾好大嘅自由度好多鼓勵我，所以我好愛戲劇呢個原生家庭。」
莊梅岩提到，戲劇這個原生家庭能令她面對不少困難、磨煉：「我要多謝各位，老師們、導演們，同埋一齊合作嘅工作夥伴，都係好照顧我劇本，我希望未來嘅日子會繼續支持，繼續照顧我哋，同埋其他年青嘅編劇。」莊梅岩亦感謝其原生家庭，在演藝學院期間看到，不少同學遭父母反對入行，但感激自己父母的支持，自首套作品便入場，又會儲下剪報。莊梅岩的母親去年離世，但她相信母親的愛，會由父親兼任及支持自己繼續走戲劇的路。
尊子頒最佳導演不失幽默本色 創作時會睇電視
《明報》早前宣布結束政治漫畫家尊子的專欄，尊子獲安排頒發最佳導演（喜劇／鬧劇）。他上台時不失幽默本色，被司儀問到多年來日復日創作：「你係點樣做得到？」尊子稱該秘密「已幾廿年」：「因為無得畫啦嘛，可以公開啦，其實嗰啲漫畫唔係我畫㗎。」司儀稱：「唔係嘛，我接唔到㗎噃，尊子先生。」
尊子隨即補充稱，在畫漫畫的時候會睇電視，查看達官貴人的發言內容：「佢一講嘢，我打開櫃桶就有幾張漫畫喺裡面㗎啦，攞返出嚟揀張無咁好笑嗰啲交俾報館咁就搞掂。」司儀追問好笑的漫畫會如何處理，尊子表示：「好笑嗰啲通常就唔會拎出去，因為好笑得滯，啲人睇完會嬲嘅。」該獎項由陳恆輝《老婦還鄉記》奪得。
杜琪峯：不如意時更要加強熱情 熱情才能化解失望
電影導演杜琪峯就頒發最佳導演（悲劇／正劇），他上台時被問到，在經歷不容易的日子時如何渡過。杜琪峯想了想說，「我過咗好多次，次次都唔同」：「見到乜咪做乜。」司儀問杜琪峯在成立銀河映像的時候，首部作品不算賣座，他表示：「有人請你咪得，有啲人鍾意請啲唔賣錢嘅導演。」杜琪峯笑言「老千又多，傻仔仲多」。
不過，杜琪峯在說笑後便正經起來：「老實啲講，呢啲唔好景嘅嘢成日都出現，佢得閒就嚟，你哋要作好準備，攞獎唔係等如你以後唔洗遇呢個問題，越攞得多你越驚，所以唔好攞咁多獎。」他自嘲「我都驚」，所以不再親身出席頒獎禮，又勉勵後輩稱：「落選咪再落選，得閒咪落選囉。」他認為在不如意的時候，更要提升自信、堅持：「更加要加強你個熱情，只有熱情先可以將當時嘅失望，或者你有啲唔如意嘅事，容易去化解。我自己都試過好多次，佢得閒就嚟，大家小心啲。」該獎項由方俊杰《大狀王》奪得，他上台領獎時要求與杜琪峯合照，稱沒想過由對方頒獎。