馮盈盈前男友中環開皮膚診所　港姐冠軍主播爭住到賀

前港姐冠軍馮盈盈舊愛、「十優醫生」鍾文浩（Martin），於2021年已迎娶曾報讀TVB第17期藝員訓練班嘅黃潁妍，近日更進軍中環開設個人皮膚專科診所，實屬年輕有為嘅醫學界才俊。估唔到佢於新店開幕當日，獲前TVB財經主播林小珍撐場，更見馮盈盈閨密、十優港姐冠軍麥明詩現身到賀，夠晒面子。

鍾醫生高大俊朗係「明星醫生」，見麥明詩毫不避嫌地同醫生哥哥麥明山到賀，大方與鍾文浩夫婦合照，而黃潁妍全程緊挽老公手臂，個樣夠自豪。而主播林小珍曾與鍾文浩合作，仲發文叫對方做「老公」，足見感情夠晒好：「恭喜我『螢幕老公』踏入人生另一階段，擁有自己嘅專科診所！Proud of you👍🏻👍🏻 」

鍾文浩係馮盈盈入行以來唯一公開承認嘅男友，畢業於喇沙書院，2005年更係「會考十優狀元」，其後於香港大學醫學院畢業。當年佢同馮盈盈愛得高調，女方經常稱對方為「寶寶」，又曾合資購入何文田豪宅同居試婚，惜戀情僅維持4年，便於2019年尾告終。

東網網站 : https://on.cc/東網Facebook專頁 : https://www.facebook.com/onccnews/