郭羨妮自爆靈異經歷　99年選港姐同房佳麗撞鬼？

藝人郭羨妮與老公朱少杰結婚育有一女，成為人母後減產專心照顧家庭。最近佢致電電台節目，自爆遇過唔少靈異經歷，透露去年6月養育17年嘅愛貓離世，懷疑兩度化身動物返屋企探佢，先有大大隻草蜢出現於十幾樓高嘅露台，為保護受驚嘅愛女一手將草蜢拍死：「後來先諗係咪貓貓呢？之後我將貓貓啲骨灰撒落屋企嘅植物度，希望將生命延續。突然有隻雀仔飛嚟露台度唱歌，呢啲冇可能發生嘅事！當我想攞相機影相，佢就即刻飛走咗。」

佢又透露曾租西貢近北潭涌單位1年，除先後與媽媽遇上血光之災入院，兩隻愛犬亦不幸離世，不時聽到有人撳門鐘，但係又冇人：「間屋好奇怪，每日都唔知自己做緊咩，搬入去全年冇買過梳化，喺屋企都係坐外景櫈，冇心機去諗點搞間屋，好冰冷。最後一家人頂唔住搬走咗。」

最後亦透露1999年選港姐到中山拍外景，有日工作完畢即返酒店房一覺瞓天光，翌日同房佳麗指感覺到有人坐喺佢張床，問係咪郭羨妮，佢即否認，懷疑兩日曾郁動房內布置故招來靈界朋友。

東網網站 : https://on.cc/

東網Facebook專頁 : https://www.facebook.com/onccnews/