網民選「靚到癲嘅女明星」朱茵排第七位 黃貫中：邊個靚過我老婆？

有網民在討論區發起票選「一人一個靚到癲嘅女明星」，現年52歲的朱茵躋身十大之列排第七位。朱茵老公黃貫中（Paul）知道這消息時，笑說：「第七位？前面六個係邊個？邊個靚過我老婆，有冇搞錯？冇可能！」兩人結婚逾20年依然恩愛，朱茵聽到老公的讚美，笑不攏嘴。

朱茵有「美魔女」之稱，Paul表示最欣賞太太並非只有外在美：「我心目中太太樣樣都靚！哈哈，其中最主要係內在美、性格，相處咁多年，外表幾靚都會對厭，一個人最緊要內在，真㗎！唔好以為我講風涼話，其實我真係欣賞佢內在美多過外在美。」至於朱茵就感謝投票給她的網民，並感到十分光榮：「好開心！覺得好光榮！大家仲記得我，對我嚟講係一個好大嘅支持；其實靚，係各花入各眼，冇一定準則，我覺得最緊要係有自信、心情要開朗，所以我盡量保持好心情。」

今年聖誕節，朱茵與Paul會跟囡囡黃鶯一家三口留港共度佳節，朱茵說：「今年會玩真聖誕樹，第一次放真嘅聖誕樹喺屋企，原來成間屋都會香晒，而且我哋提早布置聖誕裝飾，其實已經好多年冇掛呢啲裝飾，今年係隆重其事，同埋我哋有共識，今年會買好多聖誕禮物放喺聖誕樹。」她稱禮物是其次，最重要是一些小心思令家人留下開心的回憶。

2024年新工作，朱茵表示會挑選好劇本拍電視劇及電影，至於Paul來年將集中精神出唱片，他說：「呢隻碟錄咗好耐，成十年，希望有個圓滿嘅結束，所以全副精神會放喺隻碟度先。」

「一人一個靚到癲嘅女明星」是11月一個討論區的網民投票結果，以票數選出前10位名單，如下：

第一位：鍾欣潼

第二位：雲浩影

第三位：蘇雅琳（Ivy So）

第四位：李佳芯

第五位：張栢芝

第六位：陳穎欣（Yanny）

第七位：朱茵

第八位：蔡思貝

第九位：林愷鈴

第十位：袁澧林

（即時娛樂）