2025年度總結　港產片慘淡、《墨魚遊戲》最有熱度

往年嘅最後一日我都會喺story出個年度總結，今年越打越長，所以索性出個post。篇文比較個人，希望大家唔好介意🙂‍↕️

例牌先講下今年大環境，我諗大家睇得出係頗為淡靜。港產片非常慘淡，上篇文都有講到；劇集質素其實唔錯，上半年有一段時間keep住有劇追，但熱度無以往咁高。全年最多人討論反而係《墨魚遊戲》系列，可惜已經要同試當真道別；今年廣東歌數量感覺少咗，但依然有唔少高質新歌。我諗大家都要接受，市場無法重回疫情時期嘅高峰。

「夜星不閃 細聽明月唱歌 歌裡對當逐漸上升的我 以及下沉的我」

講完大環境就講下自己。早排睇年度回顧，發現我2025聽少咗歌，或者我要承認自己無以往咁熱愛聽歌，以前會特登為咗聽歌出街行下，甚至會期待搭車聽歌，依家往往只係想段路程無咁悶。不過，慶幸仲有唔少作品打動到我，陪伴我渡過無數emo嘅晚上。

「然而 我想揀今日 來流露我淒楚 聽完的人 請你扮傻」

而嚟到第五個年頭寫文，今年繼續做到最少一星期一篇，幾乎每日都會出story，寫作早已融入生活嘅一部分。然而，今年靈感係歷年最少，有啲文又會覺得自己寫得麻麻，特別係反應不如以往時，難免有點氣餒，加上時間同精神有限，有時係會寫到幾攰。

「沿路風吹跟雨打 或許一生也像圖畫 多千變萬化 茫然後方知不需要 害怕」

不過，每當感到洩氣時，我都會諗其實當初開page，都係為興趣同推廣香港流行文化，其他所有嘢都係bonus。最少我熱情未減，依然享受寫作同分享嘅樂趣，仲寫出幾篇我好喜歡嘅文章。就好似上篇講2025香港電影嘅文，明明寫咗好耐，又要對好多次，但過程係非常快樂。

「這章節 現在未如意 繼續去寫 要一直試 就像昨天 收放自如」

另外，我間中會睇返以前寫嘅文章，一字一句都記錄咗我依幾年嘅成長與改變，仲試過比自己嘅文字感動。縱使依家願意寫同睇文字嘅人越嚟越少，我仍然深信文字嘅溫度同力量係難以取替。

「讚頌夏日 同樣愛秋水 就算貪 無人會反對」

跟住想同大家分享今年一啲開心嘅時刻。相較往年，我今年睇少咗演唱會，但仍舊被live show嘅魔力感動。當中林家謙同Pandora我都睇過首次專場，今年再次比佢地現場嘅感染力震撼。仲見證啟德主場館開幕，每次去睇show都好似參與緊一場大型慶典。

「願你找到 預約那小島 毋用看地圖 日後也可遇到 無人能找到 你與我知道 夢裡對望過的 又碰到」

除咗睇演唱會，我今年仲去咗幾個旅行，當中最深刻一定係北海道。上年睇《我談的那場戀愛》已經覺得札幌好靚，今年特登去感受下依個城市，仲用半日時間親身睇下電影嘅場景，其實全部都係普通嘅大街小巷，但因為依套電影賦予咗另一重意義。當踏上少年偷偷跟蹤笑琴嗰條天橋（圖2），唔知點解突然好感動，彷似代入電影嘅世界，原來我係咁鐘意套戲，原來我咁鐘意港產片。

到早兩個星期喺一個傳媒放映場，撞到大學教我流行文化嘅教授，簡單傾咗一陣，已經有份由心而發嘅快樂。諗返起當初我只係單純鐘意聽廣東歌，睇港產片，慢慢學識諗深一層，甚至想出一分力去推廣。依次偶遇好似提醒返我嘅初心，雖然唔算學有所成，但最少叫做無浪費當年讀嘅嘢。

「謝謝讓我得寵 尷尬了有你吹捧 那八卦跟心聲 倒進杯中喝掉痛苦漸濛」

最後，要多謝睇到依度嘅朋友，喺reels盛行嘅時代，仲肯睇咁多文字實在難能可貴。衷心感謝大家今年嘅支持，每個CLS對我嚟講都係好大嘅鼓勵，亦係你地構建咗依個平台比我分享感受，為我嘅生活帶嚟一點動力同快樂。

「傷心假使抹不走 就讓淚滴找一個出口 總會 有些經歷難於宣告 欠力氣出走」

2025我同大家一樣，對人生無常嘅感受大咗好多。前路係點我地無法知道，但我地可以珍惜眼前人，珍惜時間做自己喜歡嘅事，珍惜仍然有香港流行文化嘅日子。

「看未來 若你最後看得難過 我預言 為你努力也一齊經過」

2026我會繼續寫作，繼續推介更多好歌好戲好劇比大家🫶

▼Follow hkpopculturelover
Instagram: https://www.instagram.com/hkpopculturelover/