羅子溢失落視帝唔見影　原來被頒獎盃攞「最佳男主角」

小生羅子溢憑主演《金式森林》被推為台慶頒獎禮視帝大熱，卻與獎項擦身而過，落敗給主演《新聞女王2》的黃宗澤，令不少網民戥他不值。有指子溢完騷後即不見人影，原來是他有大批來自內地、新加坡及香港等地的粉絲昨晚到場應援，賽後他即爭取時間與大家見面聚會，席間一眾粉絲向他送贈迷你獎盃和鮮花等禮物，直言他一早已是影迷心目中的「最佳男主角」。

談到敗給黃宗澤，子溢受訪大方回應：「賽果絕對公平，恭喜所有得獎者，我喺澳門參加咗個好暖心同開心嘅派對。大家唔使擔心，明年我會再接再厲，依家做好手頭上嘅工作報答大家嘅厚愛先啦。」對於太太楊茜堯送贈巨型啤啤熊幫他打氣，子溢坦言事前並不知情：「佢成功製造咗驚喜畀我。（咁對仔女手繪卡呢？）我老婆教佢哋整嘅，係咪好想知內容呢？大女心心寫咗『爸爸好叻，你係太陽，我係小草』。」難怪教子溢感動非常。

及後子溢再於社交平台晒與粉絲聚會照，並留言：「感謝每一個位投票嘅朋友，每一票對於我、對於作品嘅製作團隊嚟講都係一個好大嘅鼓勵！一班由細睇到佢哋大嘅支持者，你哋每一句說話我都有記喺心，多謝你哋！家人嘅鼓勵係我最大嘅原動力！繼續努力，創造更多令人感動嘅角色，希望你哋會記住《金式森林》嘅高深-羅子溢。」

東網網站 : https://on.cc/東網Facebook專頁 : https://www.facebook.com/onccnews/