《尋秦記》劇透影評　票房勢破億　打鬥戲驚喜精彩

都市傳說《尋秦記》喺除夕正式面世，引嚟空前盛況，票房勢破億。情懷以外，我認為電影各方面都非常唔錯，值得入場！
（以下有劇透）

「誰求誰春秋都只聽天地號令天命誰能扭轉運程」

劇情簡單直接，入局快，由三哥因為過去恩怨，帶一班現代人去古代，企圖取代秦王而開展。電影貫徹劇集鬼馬特色，仲連接到劇集嘅故事，兩個時代嘅文化衝突依舊搞笑，娛樂性充足。劇情確實有少少膠，但幾符合《尋秦記》嘅玩味。回憶片段放得恰到好處，讓觀眾感受到情懷之餘亦完整地講咗一個故事。

「誰無誰亂局亦一樣人定誰在篡改劇情」

去到打鬥戲更加係驚喜地精彩，一班帶住超越實際科技武器到古代嘅人，雖然有一定優勢，但竟然無想像中咁大差距，特別到近身戰，古代兵器絕非毫無用武之地。刀光劍影，槍林箭雨，幾場動作戲嘅畫面都非常有趣。

「別高興別以為叫始祖萬歲千歲都會依你意願來營造」

主要角色大家有基本認識，所以唔需要花時間交代背景。

當中趙盤整個角色塑造得更立體，二十多年後，佢為成大業願意犧牲一切嘅覺悟更確切，確實殘暴不仁，但唔代表佢無重情嘅一面。面對項少龍，縱然有所防範，內心依然有份關心同愛，師徒情亦刻畫得更深刻。

舊角色們非常搶眼，可惜出場時間唔太多，但每位都帶嚟滿滿回憶。

「誰贏誰不需一兵半卒便命定他年輪回今世劇情」

結局係趙盤知道時日無多，盡量做多啲事而大興土木，導致勞民傷財，民怨四起被推翻？定其實佢做咩都唔會改變歷史？孰因孰果難以說清，亦唔重要，反正最終都係順應天意，天命最高。另外，佢對待項少龍嘅處置亦接到真實歷史，仲呼應貫穿全劇嘅長生不老，實在處理得太出色。

到最尾嘅彩蛋結局，明顯為粉絲服務。雖然有啲TVB bbq ending感覺，但古代人去返現代嘅衝擊係幾有趣，亦比項少龍一個回家嘅機會，或者算係另一種圓滿。

「誰亡誰亦在歷史下效命殘酷過一夜情」

二十五年過去，戲內戲外大家都成長咗唔少，最後睇返當年嘅拍攝花絮，見到仲有點稚氣嘅演員們，轉眼間已經成為影壇嘅前輩。今次搵得返大半嘅班底確實難能可貴，見到佢地一個個登場係有份難以形容嘅感動。

無可否認，電影嘅拍攝技巧同畫面係有些少過時，有明顯補拍同配音嘅痕跡。加上三哥動機其實唔太合理，有啲對白同情節亦比較狗血，但整個觀影過程我係睇得好開心，完全投入喺電影嘅世界，非常享受。

「下一世別理誰叫高祖別要賭天命最高」

我係近年先睇返《尋秦記》劇集重播，事隔多年依然唔過時，追到停唔到。電影版為所有觀眾圓咗一個二十多年嘅夢，亦為依個系列畫上更漂亮嘅句號。

《尋秦記》成功為2026打響頭炮，希望港產片可以藉此擺脫去年嘅頹勢，亦期望更多都市傳說面世！