【腦電波 · 足球點評】世盃外圍賽焦點戰前瞻：挪威硬撼意大利、北馬其頓纏鬥比利時

尋日腦電波推介兩場賽事都估中小勝一球，美中不足係印尼嗰場開唔到大。
今日再為大家推介兩場好戲絕對唔可以錯過！挪威鬥意大利、北馬其頓撼比利時，場場都有料到，即刻同大家拆解！

挪威 VS 意大利：北歐狂獸迎戰藍衣軍團
挪威近年靠住「魔人布歐」夏蘭特（Erling Haaland）Carry，進攻火力勁到癲！過去7場狂入24球，近4場仲轟入18球，簡直係入球機器！挪威3月世盃外圍賽兩連勝，5 – 0炒摩爾多瓦、4 – 2踢贏以色列，歐國聯仲搞掂埋斯洛文尼亞同哈薩克斯坦，狀態Fit到爆！

相反意大利就麻麻地啦，雖然係4屆世界盃冠軍，但近年狀態起伏較大，歐國聯降班、世盃外圍賽開局未必會順，近3場都贏唔到，防線錯漏百出，近3場總失球有8個，今場比賽中堅馬迪奧加比亞（Matteo Gabbia）仲要因傷退出，令防線更加薄弱。不過好在佢哋對挪威有心理優勢，因為過去2次交手都贏咗。

挪威主場氣勢強勁，夏蘭特狀態正在回升，意大利防線又成日甩轆，今鋪挪威有機會「食硬」意大利！
——預測:挪威2 – 1、3 -1贏意大利，夏蘭特繼續做入球機器！

北馬其頓 VS 比利時：小國硬骨頭纏鬥紅魔

北馬其頓向來係「主場惡人」，世盃外圍賽開局攞4分，近7個主場不敗，仲逼和過意大利、英格蘭，連續12個主場有波入，都算打得！
比利時陣容強大，有迪布尼（Kevin De Bruyne）、盧卡古（Romelu Lukaku）等明星球員坐鎮，歐國聯升班B級，教練想爭取世盃門票，今場進攻火力一定超強！

北馬其頓主場表演穩定，防守堪稱堅固。反觀比利時雖然狀態波動，但實力拋甩北馬其頓幾條街，進攻端多點開花。比利時今場作客，雖有狀態問題，但陣容夠晒強，進攻有機會「打爆」北馬其頓防線！
——預測:北馬其頓1-2或1-3比利時，迪布尼領軍主導節奏，北馬其頓雖然頑強，都好難阻擋紅魔進攻潮！

總結: 今輪世盃外圍賽歐洲區呢兩場波，挪威、比利時勝算大，但足球最正就係充滿變數，一於拭目以待啦！

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen