【頭條獨家】出道半世紀鼓勵年青人追夢 陳美齡視失敗為學習機會

陳美齡（Agnes）為慶祝出道50周年紀念，將於9月14及15日假香港文化中心舉行兩場《美麗人生半世紀演唱會》，65歲嘅Agnes係「史丹福媽媽」，3子都畢業於該名校，家庭、事業兩得意的Agnes自爆曾經歷過短暫難關，好彩性格樂觀，每次都能從失敗中學習。採訪：方騫平 攝影：梁志明
陳美齡兩年前喺伊館開過講唱會，形式同今次不同，今次演唱會會選唱一啲香港觀眾熟識嘅歌，好似《再見19歲》、《忘憂草》及《珍珠淚》等。Agnes同《聲夢傳奇》學員鍾柔美都係14歲出道，當年熱愛唱歌，不時做義工獻唱，最後被音樂人發掘做歌手，繼而進軍埋影壇。17歲再轉戰日本。她笑說：「我的志願冇諗過做歌星出唱片，突然紅咗咁耐真係好神奇，完全唔知發生乜事，諗返起都好佩服自己咁有勇氣，細細個離鄉別井去日本發展，又唔識日文。既然《聲夢》學員有咁好嘅舞台，趁年輕追求夢想非常好。」
歌手的使命
談到Agnes嘅半世紀美麗人生，她就話唔係一世都順風順水，只係人睇你好，你睇人好，不過都好感恩。「我病又病過(2007年患乳癌)，早段時間喺加拿大讀完兒童心理學，同唱片公司意見有分歧，加上嗰段時間爸爸去世，家人想我快啲結婚，一度好迷惘，直至返咗媽媽桂州鄉下，當地小朋友竟然識唱我嘅《歸來的燕子》我好感動，明白到上天安排我做歌手係有使命，心結亦解開咗。」