【入廚Tips】點樣煲紅豆至易起沙

相信近排唔少人都會在家煮食，連帶廚藝都有所精進，唔知煲糖水技巧又有無進步呢？因為唔少友人都係WhatsApp谷度問點樣令紅豆沙煲到起沙喎，於是請教經驗大廚過兩招，總括而言，就係要識得雪同有耐性嘞！

其實紅豆易煮腍，但唔代表容易起沙，正如上文講，想煮到紅豆起沙，有一個步驟係必須嘅，就係冷藏法，即是將浸過夜嘅紅豆隔水，放入雪櫃雪至少4個鐘，利用冷縮熱脹嘅原理，令受冷收縮嘅紅豆遇熱時脹大，腍得快亦更易起沙。

坊間亦有說，可以將煮至腍身嘅紅豆撈起，用廚具幫助壓爛，去衣後再煲煮，如果怕成煲都係沙欠口感嘅話，可以預先盛起小部分，待差不多完成時放回煲中即可。

如果想加入陳皮嘅話，最好先將陳皮浸水，刮去果囊（唔刮嘅話會帶甘澀味），與浸過夜冷藏過嘅紅豆一齊放入煲內同煮，煲至起沙後加入冰糖或片糖調味即成。

東網網站 : https://on.cc/

東網Facebook專頁 : https://www.facebook.com/onccnews/