黃嘉樂21年冇緣做男一 哽咽憶亡父：我跪地同佢講唔好走

43歲黃嘉樂入行21年，先後演出過不少劇集如《皆大歡喜》、《無考不成冤家》、《衝上雲霄》，但就從未做過男一！近日黃嘉樂作客無綫節目《星光路上》時，被問到為何堅持追逐「演藝夢」時，就哽咽表示全因同亡父有過約定！

黃嘉樂對節目主持人潘盈慧透露自己中學畢業後，原本想做海關，但因為爸爸反對而轉為做電訊公司。有次被派去清水灣電視城藝員部整電話就憑住個靚仔樣而獲邀入讀藝訓班，最後在爸爸同意下投身電視圈。藝訓班畢業後就跟「Liza姐」汪明荃合作拍處男劇《無考不成冤家》做母子，當時更加因為戲份不少而惹來同期演員冷言冷語，質疑他「有後台」。

在演藝圈活躍多年的黃嘉樂一直星途平平，直到2011年有機會轉戰內地演出古裝神話劇《媽祖》才令他知名度大增，但當時黃爸爸卻傳出癌病惡化，人在內地的黃嘉樂感到茫然，剛巧監製梁材遠請他回巢拍攝《守業者》，黃嘉樂決定返港拍劇兼陪伴爸爸走最後的日子。提起亡父黃嘉樂都不禁哽咽：「爸爸未過身前，我跪地同佢講唔好走，我話我（嘅事業）會好架，但結果佢都係睇唔到，我問佢有冇覺得我入錯行？佢話冇，又叫我畀心機、唔好放棄，我先可以繼續堅持到今日，所以千祈唔好再問我『做咁耐都係啲唔太緊要嘅角色，點解仲繼續做？』，因為我應承咗爸爸。」