方皓玟現身新城為新節目《生命玄關》打頭陣 大爆聽過「鹹濕鬼鹹濕啲女仔」？ 堪輿學家關雲麒師傅直批小明顴骨高有一缺點？

由范振鋒主持的全新節目《鋒繼續吹》，逢星期四將加入「生命玄關」環節，邀請知名堪輿學家關雲麒師傅擔任嘉賓主持，並於8月21日晚上11:00 – 11:30首播，而第一集請來關師傅的好朋友歌手方皓玟(小明)，大談掌相命理、風水玄學之餘，原來小明曾是「高靈人士」，少女時代的她經常聽到靈體玩耍的聲音，還大爆真的有「鹹濕鬼會鹹濕啲女仔」？

遇上「極品」傭人 苦忍3年

小明與關師傅認識多年，經常請師傅指點迷津，解決了不少生活上煩惱，就連請傭人都要靠關師傅出手：「我搵過一位傭人姐姐真係極品，比軒仔(張敬軒)嗰個仲勁，唔止早餐煮得衰，所有嘢都衰，好辛苦忍咗佢3年半，真係好委屈。」後來關師傅在十多個傭人當中，為小明挑選一位，她馬上辭去舊傭人：「我即刻換，冇睇名、冇睇樣、冇面試，點知非常之好，我安樂晒，可以專心做嘢。」在面相上，關師傅指小明顴骨高甚有福氣，但晚年可能要靠另一伴照顧生活。

聽到鹹濕鬼會鹹濕啲女仔

小明十多歲時經常會聽到靈體在玩耍的聲音，令她十分困擾，她憶述：「我成日聽到佢哋(靈體)喺度玩，身邊朋友又畀佢哋整蠱，但就唔搞我，同埋有鹹濕鬼呢樣嘢，有啲鬼係會鹹濕啲女仔，最恐怖發生喺凌晨三、四點，去到五點或天光就冇事。」

一把臨死前嘅尖叫聲 好恐怖

最後一次聽到靈體聲音在17歲，小明在節目中透露：「我喺牆邊聽到一把臨死前嘅尖叫聲。（你點知佢臨死？）嗰啲聲音好奇怪，歇斯底里咁，鑽入隻耳入面，好似最後呼叫同最後一口氣，好恐怖，好心寒，你係感覺到佢哋情緒。」

「解豫居易學研究中心」關雲麒師傅三代易學傳人，以科學思維重構傳統術數，對於玄學飛星及玄空大卦風水、面相、擇日、公司及嬰兒改名、奇門遁甲等，尤有心得。他自幼隨外公譚貴和（清宣統年間舉人）學習算命及風水，約10歲便隨外公登山涉水，尋龍點穴，其後更修習各門各派精髓，四出跟從名師學習，從事玄學風水命理工作已超過十多年。

圖片來源：新城廣播