高鈞賢激罕公開閃婚兼火速造人成功內情　與繼子女關係曝光

藝人高鈞賢去年尾突然宣布婚訊，並在今年初升呢人夫，雙喜臨門。近日他接受電台節目《星光背後》訪問，罕談與太太相識淵源及結婚過程，他透露早於疫情前，二人已因工作認識：「3、4年前我哋只係朋友，因為佢公司有部分生意係護髮，佢搵我幫手拍片。當時只係朋友約吓食飯，已知道佢細我10年同有小朋友。最初覺得佢好識關心人，又叻又靚又勇敢追夢同識養生。」但因當時未試過追求離過婚及有小孩的女性，所以未有進一步發展，直至疫情後到內地工作重遇，才愛上對方：「各有各生活幾年，我亦經歷過感情上嘅錯摸，先發覺呢啲（結過婚及有小朋友）根本唔係問題，最緊要大家夾，同理解明白我。」

他更大爆原來與太太是閃婚：「我哋好犀利，無嘥過任何時間。由拍拖到計劃結婚同生BB，係1年左右」，且一擊即中造人成功：「我哋plan就一擊即中，因為佢公司做產前產後養生呢行，知點調埋身體。到我5月生日，佢就plan個trip去馬爾代夫，我哋去馬爾代夫就係計劃去做呢件事。真係好順利，1個月後就知。當時係覺得開心同幾勁，係一擊即中！」講到他公布婚訊後，因太太富家女及曾經離婚的背景要被網民攻擊，他就笑言：「畢竟佢唔係圈中人，亦係後生女。所以公布嗰陣，話一定要講清楚細過我10年，其他都唔太理。當然佢有唔開心，我亦有心痛，所以第一時間企出嚟講返件事，好過太多猜測。」

而講到做人繼父，他亦罕談與一對繼子女的相處之道：「我反而覺得過程中難嘅係小朋友一方心理調節。我認為大人嘅角色就係要做朋友，我都係叫佢哋叫返我Matthew。同外國人一樣，唔需要迫佢哋叫我爹哋。因為佢哋知道自己爹哋係邊個，佢哋長大後就會有自己方法處理。」又大爆繼女想改跟他姓高：「大仔比較懂事，而妹妹始終係女仔，會敏感啲。佢依家成日問媽咪，幾時幫我改姓高。佢會諗好多嘢，想同我依家個囡囡高子琳close啲，呢啲我完全都唔會夾硬迫。總之我會負責番，點樣令大家一齊開心，或者到佢哋大個叫我爸爸，我當然會好高興。」

東網網站 : https://on.cc/東網Facebook專頁 : https://www.facebook.com/onccnews/