東京6大超市懶人包$5一大杯啫喱 日本掃平貨好去處 全部平靚正！
唔少人去日本旅行都一定會行埋當地超市，無論係零食、生果，定係調味料，全部都可以喺超市買齊，加上超抵價格，絕對係不可錯過嘅必行地方！
今次小編精選東京6大超市，分析佢哋嘅特色，等大家可以喺唔同嘅超市買到自己心水嘅貨品！
1. LIFE Supermarket
大家應該對LIFE Supermarket唔陌生，除咗關東之外，喺關西地區都有分店，係規模較大嘅超市之一。
LIFE嘅貨品種類齊全，仲經常有不定期優惠，可以喺度買到心水嘅特價品。生果、熟食等種類多得嚟價格又平，超級抵啊，例如之前就有「蜜柑放題」，一袋蜜柑都係賣500円咋！
LIFE有提供Visa、MasterCard付款方式，就算唔夠現金喺身都唔洗驚。
2. maruetsu
相比LIFE，maruetsu嘅規模相對較細，店舖面積唔算大，但五臟俱全，食物、生活用品都有，而且分店多，總有一間喺左近！
maruetsu係做新鮮漁產起家嘅，推薦買佢哋嘅新鮮食品，例如刺身等。而maruetsu推出嘅自家品牌都有品質保證，而且價格比一般商品平，其中一樣就係鮮奶，由北海道直送，奶味香濃，必買之選！
3. OK Store
大家都知超市嘅價格普遍比便利店平，但呢間「OK Store」仲要比一般超市更平！
OK Store嘅價格牌仲會標明自己嘅售價係市價幾多折，完全滿足大家買平貨嘅自豪感啊！
OK Store有提供乾冰同冰嘅服務，只要喺埋單嘅時候同店員講就可以拎到乾冰或冰喇！有冰嘅話，夏天買雪糕都唔怕融，買刺身亦都可以保持新鮮啦！
4. 業務超市
同樣主打低廉價格嘅業務超市係唔少日本主婦嘅掃貨之地，除咗平之外，業務超市嘅商品仲係大容量包裝添！
有啲商品係只有業務超市先有得賣，例如牛奶盒裝甜品，係業務超市集團嘅自製品牌，有布甸、羊羹等，啱晒份量夠大先食得滿足嘅甜品控！
唔止甜品，各種零食、飲料都係大size，最適合一家人買返酒店一齊share啦！
官網：https://www.gyomusuper.jp/index.php
5. 西友超市 SEIYU
SEIYU最大嘅特點係大部分分店都係24小時營業，而且店面極大，就算玩晏咗都唔驚買唔到嘢。
SEIYU入面各種生活用品、零食、生果都應有盡有，夜晚可以嚟買宵夜食。
最重要嘅係，SEIYU嘅價格並唔貴，簡直係夜貓必去掃貨之地啊！
6. 成城石井
同前面提及嘅超市相比，成城石井嘅價格較貴，因為大多都係進口商品。不過都有好多自製嘅糕點都值得一試。
其中最高人氣嘅就係成城石井自家製芝士蛋糕同熱餅乾，深受日本人嘅喜愛，買嚟做早餐都唔錯㗎！
同樣受歡迎嘅仲有五三燒蜂蜜蛋糕，口感柔軟，味道香甜，非常適合做手信。
東京有咁多間超市，想掃平貨就千祈唔好錯過！睇完上面嘅介紹，去之前了解清楚就更易買到心水平貨啦！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）