政Whats噏：楊永杰將辭區會主席　建制掀爭奪戰？

喺議會單打獨鬥，議員嘅發揮有限，唔少新任議員都會「埋堆」組成聯盟。選委界議員梁美芬聯同九龍西直選議員梁文廣、九龍中直選議員楊永杰3人話未來會喺議會有機合作，其中楊更會辭去九龍城區議會主席一職，花更多時間投入立法會工作。九龍城區議會大多議員屬於建制派，咁會唔會掀起一場主席爭奪戰？

楊永杰話考慮辭去九龍城區議會主席，集中精力處理議會事務。佢認為出任區議員13年，掌握地區事務，無論係咪主席身份，相信都可以聆聽市民聲音，讓出主席位置畀其他兄弟姊妹，會更有利社會發展。究竟幾時會辭任區議會主席？佢話會主持埋嚟緊6號嘅區議會大會，之後再同一班同事商議主席人選，初步定好之後先會向政府辭去主席一職，同埋處理辦事處事務，估計最快2月底生效。

被問及會交棒畀邊個？有冇心水人選同埋曾任主席嘅潘國華係咪首選？佢只係話一切都有可能，又強調議員同事之間一定會協商好，唔會擺上枱面競爭咁話。

九龍城區議會共有12名議員，5人聲稱冇政治聯繫，當中包括咗民主派嘅黃國桐，另有4名係民建聯成員、2名經民聯成員同埋1名自由黨成員，而自由黨成員何顯明出任副主席，牌面睇係建制派人數佔多，但邊個建制派區議員會坐上主席寶座呢？大家拭目以待嘞！

講返議會合作，梁美芬話同楊永杰、梁文廣過去一直都有合作，其中梁係西九新動力副主席、楊同樣相當支持西九新動力工作，佢更即場展示多年前支持者贈送嘅畫，畫中有佢哋3人，仲話希望爭取海濱長廊、改善水質臭味同減輕噪音等訴求。

梁認為3人有合作基礎同足夠默契，希望帶到頭，有個全新開始。佢又強調西九新動力唔係政黨，光譜相當闊，可容納唔同嘅朋友及專業人士。但佢哋着重群而不黨，笑言自己有好多「衞星組織」，但西九新動力係「根」，讓政策符合千家萬戶市民嘅需要。佢又指暫時冇具體工作安排，自己仍會喺九龍西設辦事處，又話合作絕不限於3人，只要對大局好都持開放態度。

東網網站 : https://on.cc/東網Facebook專頁 : https://www.facebook.com/onccnews/