張敬軒心情低落隊腩河　3個Fans笑住等偶像好諷刺

歌手張敬軒向來對粉絲親善有禮，有求必應，令不少粉絲和網民都大感窩心。不過，他前晚突然於社交網「放負」，表示：「身邊有人發生咗啲事，我今日嘅心情係好沉重，今晚喺工作過後Derek帶我兜咗一陣風，然我坐低喺華南（軒仔經常幫襯的粉麵店），諗住靜靜咁食碗河粉，亦係我今日嘅第一餐。我由行入舖頭嗰一刻開始，佢哋三個就細聲講大聲笑，應該係講緊終於喺度捉到我了，老闆娘話佢哋捕咗我好耐…我對筷子喺度夾緊啲粉，如果我嘅注意力唔擺喺兜粉度，我諗我嘅眼淚就會流落嚟。而成間舖頭，都充斥住佢哋三個嘅笑聲。我嗰一刻嘅心情同佢哋嘅心情形成咗極度諷刺嘅對心，不過我知道我嘅難處佢哋唔需要知道。」

軒仔PO完這段文字後，網民都心痛他於心情相當不好、擔憂好友時遭受到「騷擾」，紛紛留言叫他適當的時候要拒絕：「要畀無邊界嘅人知道，你係有底線」、「有時睇到呢啲畫面，我內心裏面人有好多矛盾同糾結，會心痛你會唔明白點解呢一類粉絲喺享受自己快樂嘅同時，點解唔會諗一諗有冇為你構成壓力？」亦有人留言:「做歌迷要有邊界感的，佢嘅私人時間就唔好打擾佢啦！」

未知是否引起太多網民關注，軒仔似乎為免事件發大，事後已刪Post。此外，軒仔前日下午出席活動後的片段流出，離開會場時他遭不少粉絲圍堵，當時他的笑容明顯比平時少，穿着厚外衣的他又表示好熱，但仍逐一接過粉絲的禮物，網民看了都叫大家：「需要走時畀佢走啦！」

東網網站 : https://on.cc/東網Facebook專頁 : https://www.facebook.com/onccnews/