楊偲泳天生怕醜女　顛覆童年夢想

藝人楊偲泳（Renci）出道快將10年，於電影《私家偵探》中演一名任性女生，周旋在一眾江湖猛人當中，她透露角色並非有甚麼目的，純粹只因貪玩而玩弄幾位男生的感情，享受被稱呼「阿嫂」的感覺，是她首次演如此「花弗」的角色。她坦言戲中尾段一幕最為難忘：「我啲手腳畀人綁起，好似春卷咁郁唔到，喺水入面拍掙扎戲。（好危險？）係嘅，古老闆（古天樂）同劉冠廷都喺度，每次拍完即刻撈番我上嚟。」雖然危險，但她笑言很期待，因現實生活中難有機會有此體驗：「原來真係會係咁濁親，個人好亂，因為我個人相對比較冷靜，但原來喺咁多事情一齊發生，真係會比較混亂同激動。（唔怕死？）唔驚，拍戲大家都會喺安全情況下去進行。」

問到跟古老闆合作會否緊張？她直言不會，並大讚對方是一位非常好的前輩，不會用説教方式，而是以分享的形式跟大家討論，不用埋位時還會跟大家聊天，了解一下新一代演員會喜歡甚麼類型電影，令大家感覺很舒服。

電影全程於外地拍攝兩個多月，是Renci的首次，她更自爆因不熟悉當地文化及言語而弄致笑料百出：「拍戲經常有人『萬歲』，會喺Walkie（對講機）聽到工作人員嗌，例如Renci萬歲蛋撻，即係請食蛋撻，有次喺片場突然聽到有人叫萬歲飲水，我心諗邊個萬歲飲水咁孤寒？原來馬來西亞任何液體都會叫做水，但其實係果汁或者茶，落雨佢哋會叫落水，哈哈！」

談到如何評價自己這10年的表現？她覺得這只是人生中一段很短的時間：「今日唔知聽日事，如果我視佢為一個終生職業，其實依家都係一個好初步、摸索嘅階段，尤其演員係冇終點，唔係話攞終身成就獎就係最後，其實係不斷碌落去。」她表示人生道路仍漫長，或許忽然有天會想轉行也説不定：「可能我有日瞓醒會想做老師、做飛機師都唔定，但暫時呢一刻我會演好自己嘅角色，對我或對身邊嘅人係最好嘅交代。」對於獎項，她坦言不會刻意去想，當然演員獲獎是值得高興，笑言會有衣錦還鄉的感覺。

楊偲泳坦言天生比較害羞，小時候在一大班人面前演畫劇會很不知所措，覺得很尷尬，故她的兒時夢想中從未出現演員兩個字：「我鍾意電影係因為我可以匿喺攝影機後面，喺片場做自己想做嘅事，有好多創作空間，我只需要面對一、兩個攝影機，對我嚟講係自在。」問到若有舞台劇邀請豈非要推掉？她笑言內心也很想去挑戰，藉此去克服自己的弱項也不錯：「如果我衝破咗我咪好醒目仔？」她笑指其實最怕綜藝節目，試過有網友指她太寡言，更計算她在節目中講過幾多句話，她笑稱其實大家誤會了，形容自己是極端到爆炸：「可以全日唔講嘢，但喺熟悉嘅圈子，譬如屋企人、由細玩到大嘅朋友面前我可以好嘈，嘈到會叫我靜啲，哈哈！」

化妝：Jenny Shih

髮型：Hair：Nickienick@twotwo.hair

東網網站 : https://on.cc/東網Facebook專頁 : https://www.facebook.com/onccnews/