何依婷產後首公開亮相　「神隊友」幫手湊B随時復工

花旦蔡潔、陳瀅、何依婷及羅子溢、吳啟華等今日為新劇《執法者們》站台宣傳。今次是何依婷產後首次公開亮相，目測她已成功修身，狀態相當不錯，她卻自爆與產前尚相差10磅：「BB依家兩個月，唔喊嘅時候都好好玩，仲未戒夜奶，同埋之前我病咗，所以由嗰時開始佢已經戒人奶喇。（追多個？）暫時唔會，我都想做吓嘢先。」她指已有足夠準備随時復工，又讚老公是神隊友，樂意幫手湊小朋友。談到今次角色被綁架及割掉器官，何依婷打趣：「嗰時覺得好慘，依家諗番好好彩，因為相信都係最後一次有人搵我演少女角色，公司都唔夠膽再搵我啦。」

今次是蔡潔與黃宗澤第8次合作，終於有機會演夫妻，可惜悲劇收場！她打趣：「係比較虐心嘅戀情，我負責搞喊佢。我嘅戲份唔多，但要喺短短嘅演出中同佢經歷冇咗BB、分開、再復合及再有咗BB，所以情緒起伏都有啲難演，每次開工我都會同佢傾戲，討論加多少少嘢令效果好啲。唔知點解我做咩角色都會俾人綁架，希望下一次可以調轉啦，哈哈！」

陳瀅則自爆手頭上有張「TVB男神Check List」，今次如願與馬國明合作：「以前冇同佢合作過，佢同我想像中一樣，好貼心記性又好好。同佢合作我又成功集多一個（男神），依家淨係差陳展鵬咋。」她透露下星期將向《璀璨之城》劇組報到，今日再將頭髮染得更金，以配合角色造型，目前相當期待今次的新嘗試。

至於羅子溢和吳啟華齊演反派，原來這是兩人相隔9年再次合作拍劇，吳啟華笑說：「我哋同9年前都冇咩分別啫，只係子溢做咗爸爸，所以我哋好多偈傾，傾吓小朋友，又傾吓表經，佢好鍾意收藏手錶。（相隔9年再拍港劇會唔會唔慣？）冇乜分別，咁拍邵氏劇比拍TVB劇係舒服啲嘅。」

談到林保怡主演的《刑偵12》出現「程至美醫生」的名字，曾有劇迷猜測他會客串演出變彩蛋，最終卻「美夢落空」，吳啟華直言由始至終未有人接觸過自己：「咁我係咪可以攞版權費呀？哈哈！（如果再搵你演程至美，你肯唔肯？）冇所謂㗎，我演員嚟吖嘛。」談到馬景濤日前直播帶貨時暈倒，吳啟華直言自己在內地亦有直播：「佢好似着晒古裝又戶外唱跳，佢好辛苦呀。（咁你呢？）我唔會俾自己咁辛苦，好錫身，一把年紀唔可以咁辛苦喇。」

另外，羅子溢日前帶一雙子女到街市買餸，他解釋：「要訓練佢哋嘅自理能力，唔係一定有工人姐姐嘛，買餸都唔識第時咪餓死？唔可以咁，唔好以為自己係富二代，咪以為睇得爸爸演富二代多，就真係好有錢先得！每個小朋友都一樣，唔好因為我哋嘅職業而影響到佢哋。」

東網網站 : https://on.cc/東網Facebook專頁 : https://www.facebook.com/onccnews/