《風林火山》劇透影評　銅鑼灣場景加槍戰爆破歎為觀止

都市傳說《風林火山》上映後引嚟熱烈討論。起初批評聲音不絕，及後逐漸有返唔少正面評價。我睇完之後都有幾多想法，下面慢慢會闡述。不過簡單一句，我覺得套戲係值得入場欣賞嘅。

（以下有劇透）

先講感受，我完場第一個感覺係套戲唔算太差，不過細想後確實有唔少問題。

講咗優點先，畫面靚，演員正，美術、服裝都係世界級。銅鑼灣個景再加槍戰同爆破場面，令人歎為觀止。

剪接亦相當出色，可以喺眾多段落中拼湊出一個睇得明嘅故事，起承轉合做到出嚟，觀影過程我係相當投入。戲中營造出嘅世界觀非常吸引，好想可以了解多啲，比起近十年相對一式一樣嘅警匪片更有新鮮感。

講完優點，再講下做得麻麻嘅地方。

其實故事並唔複雜，敘事睇到脈絡，但確實散亂，節奏一時急，一時慢，劇情張力亦唔夠。雖然故事顯淺，但角色好深，唔少位置受篇幅所限而太簡略，要觀眾腦補內容。

梁家輝角色定位唔太清晰，睇得出背後有一言難盡嘅故事，但剪接後被割捨唔少，變得草草了事。同老婆嗰段短到難以理解，IG文案寫得仲詳細；

劉青雲可以喺黑白兩道遊走，竟然一下子一敗塗地。同女女嘅戲份太少，令犯案動機顯得更無力；

高圓圓發揮更少，雖然有啲伏線寫到佢好似終極大佬，但主要都係靠觀眾推理，無咩太實質嘅佐證；

古天樂個角色反而寫得唔錯。雖然最後都唔知太一係邊個，但其他描述幾完整，佢亦演得有驚喜，係古生近年最令我深刻嘅演出；

最後，金城武嘅魅力實在太強大，嗰份壓得住所有人嘅氣場完美符合角色，一出場已經吸引曬大家眼球，為電影生色不少。

連其他配角都寫得好有發揮空間。Juno出場係幾有feel，帶住千絲萬縷嘅故事，但完全講唔到出嚟；任賢齊明明位居核心，但未睇到佢為警察做過啲咩就死咗，非常可惜；鮑姐反而比到完全唔同感覺觀眾，出場唔多依然令人難忘。

正因角色太多，描述又唔夠，一路睇要不斷思考角色嘅背景同關係，仲會產生唔少疑問。簡單一句就係太貪，隨便一個主角已經係一部電影。

氣氛營造方面，Juno風格的確好強烈，站位、調色睇得出花過心思，但就係太著重於畫面，一開始會覺得幾正，但睇足兩個鐘就開始厭。

戲中仲有唔少無咩作用嘅情節，好似落雪、搶藥物、輻射區，整個城市亦有種末日來臨嘅感覺，依啲設定相當有趣，但全部只係蜻蜓點水，埋咗伏線又無解返。甚至銅鑼灣槍戰同後面嘅關連好似都唔大，結局亦略嫌兒戲。

再者，電影好強調發生喺1994年嘅香港，好似銅鑼灣充滿懷舊味道，後段亦刻意提及重慶大廈(實質取景喺怪獸大廈)。可惜其他室內外嘅取景都好唔香港，完全無熟悉感，更似架空時空下嘅故事，我覺得背景設喺2094年嘅香港仲恰當。

再講講最後《樹大招風》式嘅彩蛋，點解當年依幕咁震撼，係因為三大賊王一直想合作做單大野，鋪排咗成套戲，點知未聚首已經失敗，最後一幕發現大家曾經喺同一個地方出現，嗰種命運注定嘅感覺先令電影餘韻咁強。然而，當《風林火山》五位主角之間嘅關係建立得唔深，最尾依段就顯得相當尷尬，仲有啲不明所以。

講完一輪，做返個總結。

如果你本身對Juno有認識，或者入場前睇過啲文案同簡介，依套戲係相對易入口，係fans就更加會享受依種獨特嘅美學同風格。然而，如果對Juno無咩認識嘅街客入場，真係未必習慣到，自然睇到一頭煙。依個亦係評價如此兩極嘅原因。

說到底《風林火山》一定稱唔上係爛片，不過以依個陣容同預算，仲要期待咗咁多年，最後只拍出一套合格水平左右嘅作品，確實令人失望。不過，我認為成本超過四億嘅作品比比皆是，縱使成果未如人意，但都慶幸Juno有做依個嘗試，依部可一不可再嘅電影絕對有佢嘅價值。

戲內戲外可以討論嘅實在太多，我諗對得住都市傳說依個名銜，特別今年港產片市場咁靜，有一套戲得到咁熱烈嘅關注都未嘗唔係一件好事。

娛樂