Tyson Yoshi浙江玩越野爽到爆粗　將結婚要更安全：責任大咗

香港歌手Tyson Yoshi早前去到浙江參加車品牌活動，除了駕駛四驅車玩越野外，更加落到浙江國際賽車場體驗落場快感，更指自己爽到爆粗，辛苦拍攝團隊指走「助語詞」。

Tyson Yoshi早前參加由Mercedes-Benz Hong Kong主辦的「G-Class & AMG Driving Experience 2025」。活動於浙江的G-Class Experience Center (G級越野車體驗中心)及AMG Experience Center (AMG體驗中心)舉行。
Tyson在專業的越野駕駛教練的指導下挑戰陡坡、涉水與碎石障礙。Tyson興奮表示：「今次揸電動版，真係估唔到咁爆。開始時，我驚架車行到中段會比啲大石頂住，點知部車完全無懼個地形，一樣輕鬆越過，好似根本冇受影響咁，真係好堅，堅到我忍唔住爆左幾句粗口，辛苦大會攝製隊要幫我剪走啲『助語詞』。」他又補充：「個G-TURN原地轉圈真係幾誇張，平時打機先會見到呢啲超技術，依家自己真係坐喺車入面，感覺好震撼。」
隨後轉戰浙江國際賽車場，他笑說，「啲車快到好唔現實，最勁係快得嚟，入彎又唔驚，唔會有甩尾感覺。我平時都鍾意揸跑車，今次真正感受到揸跑車係一種樂趣。」被問到這趟旅程與平時駕駛有何不同，Tyson坦言：「平時揸車多數係開工收工，或者去下morning drive，但始終都係正常市區路面狀況，唔會太過癮。今次體驗完全唔同，可以安全地做哂我平時揸車唔敢做嘅嘢——例如踩爆油門、衝斜坡、轉彎都唔驚甩尾，真係玩得夠盡，好爽。跑車同男人一樣，辣得嚟要有安全感，揸車嘅enjoy，乘客都enjoy。」一向寵愛女友的Tyson即將為人夫，坦言：「責任大咗，更加重視安全駕駛，為家庭為工作，都要好好保護自己！」