王智騫拍BL劇易建立信任　最驚同女仔拍親熱戲

藝人王智騫（Martin）最近憑台灣BL劇《靈魂約定》人氣急升，他今日（11日）出席新劇《翻盤下半場》記者會時透露，在劇中會與女子組合Lolly Talk成員阿蛋有感情戲，笑言未收劇本前十分擔心：「今次係我第二次拍劇，有男女感情戲，最驚有親熱戲，怕會激嬲對方粉絲，後來收到劇本，鬆一口氣，好彩冇親熱鏡頭。」

問到Martin跟阿蛋拍攝有何難忘事？他表示最難忘跟對方的一場分手戲碼：「阿蛋第一次拍戲，佢拍分手戲好緊張，佢驚入唔到戲，所以我拍之前，特登做啲囂張嘢激嬲佢，幫助佢入戲。」提到拍BL劇容易還是跟異性拍感情戲容易？Martin指：「演身體接觸戲嘅時候，同男演員信任會較易建立，加上如果對手係Kenji范麒智（《靈魂約定》對手）嘅話，大家太熟，可以毫無顧慮，反而同女演員就要溝通多啲。」此外，Martin又大爆拍《翻》的趣事，他表示：「劇中角色原本衣着斯文，但劇組知道我有操肌，將我啲戲服剪爛晒，變成背心。」

東網網站 : https://on.cc/東網Facebook專頁 : https://www.facebook.com/onccnews/