【專訪】首踢職業即遇腰斬 鄧筵霑：珍惜有波練的日子
【獨媒報導】第五波疫情早前肆虐，港超聯自二戰以後首次腰斬。今季新軍組成的香港U23，在聯賽未響勝鼓，便要結束球季。19歲的鄧筵霑，是香港U23 陣中第三年輕球員，他接受《獨媒》訪問時自言十分珍惜「有波練」的日子，「做細有人carry，但始終唔可以畀人覺得自己係𡃁仔，就容許有失誤。好多人入場係睇比數，唔係睇你踢得好定唔好。」
飛馬、愉園欠薪自降，足總副主席霍啟山季初牽頭成立香港 U23，力保港超聯維持8支球隊。在香港U23 成立記者會上，黃威、謝家榮及鄧筵霑成為球員代表，記者都一臉疑惑，只知「學界見過佢」。原來這是主教練張健峰個主意，特地喚鄧筵霑出席，讓未滿20歲的他有機會學習面對傳媒。
傑志巴塞足球學校出身 升理大邊讀邊踢
早上七點起床，到將軍澳足球訓練中心練習，練完波回校上堂。上午練波，下午讀書，這原本是鄧筵霑的日常，不過早前卻給疫情打亂。
鄧筵霑去年升上大學，他在理大修讀社會政策及社會企業。他中學唸理科，原本透過運動員計劃被派入理大的市場學系，但有感「市場年年都變，手法又年年都變，唔洗喺大學讀啦，想讀啲闊啲嘅嘢。」
隊友都叫他的英文名James 諧音「占士」，「不過我踢防中，唔係英超嗰個踢翼。」小一開始踢足球，那年暑假參加馬會足球訓練班，「占士」後來加入傑志巴塞足球學校，和同期的顏翱天、曾以行到過西班牙，對過巴塞的青年隊，鄧筵霑最喜愛的球員是沙維、恩尼斯達和布斯基斯。
後來轉到太陽國際，加盟車路士足球學校，然後順理成章成為愉園U18青年隊球員；但遇上疫情，鄧筵霑只為愉園踢了兩場預備組聯賽。
原本計劃跟愉園升上一隊，但遇上連環不幸事件，先有愉園欠薪自降甲組，鄧筵霑一度以為美夢要落空，本來已叠埋心水打算踢甲組。獲睇中加盟香港U23，又碰上第五波疫情。
前男拔隊長 外出比賽感受差距
足球對鄧筵霑來說，原本只是玩票性質，立志成為職業足球員是近年的事。「嗯，其實之前嗰幾年都唔知自己踢緊啲乜，落到去又無自己風格。」記者不禁插咀，「你好似係男拔隊長噃？」鄧筵霑帶點靦腆地說，「係啦，呢幾年好少少囉，感覺上自己同職業爭好遠。」
在男拔校隊踢防守中場，更試過在決賽入致勝一球，鄧筵霑亦坦言，自己其實不是「那麼隊長」，直至在精英賽和更年長的球員比賽，他才真正建立起信心。
後來入選港隊青年隊，南征北討下看到和外國同齡球員的差距，這令鄧筵霑決心更努力。「我真係防中嚟㗎，雖然防守唔叻，但會繼續努力。」鄧筵霑笑言，在學界比賽「放波」很容易，職業足球則不是那麼簡單，他在香港U23 更要攻守兼備，「要俾到波就一定要諗快人哋一步先得，嗯，我諗我要更努力先得。」
香港U23 在開季前曾約戰港甲的北區，鄧筵霑自言踢得很差，憂慮需要更多時間才能適應港超聯的節奏。然而，比賽便是最好的訓練，他在數場比賽後，便已有更大的體會，「日日練波都對同一班人，比賽可以學到好多嘢，有時會俾人㩒住打⋯⋯嗯，可能都唔係有陣時。」
處子登場視野原來好窄 悟細節的重要
在處子上陣對晉峰的比賽中，親友均有入場觀戰。鄧筵霑不其然有點緊張，但卻感到十分有趣，「好似咩都睇唔到，睇嘅位好窄，平時喺球場睇嘢好闊，但嗰場眼前淨係睇到一條線。」踢職業足球，令他更明白細節的重要，「畀波你畀到就一定，更重要係畀到佢要嗰隻腳，幫到埋下一步。」
球隊今季有多名超齡球員壓陣，包括黃威和羅曉聰。鄧筵霑便表示他們會「大聲提點」，「開頭同佢哋踢都有壓力，細細個睇佢哋踢波，到做自己隊友」，又透露二人會在訓練後對一眾年輕球員再「傾下偈」，點出可以改進的地方。
七球不敵東方 的士司機送鼓勵
香港U23 今季曾不敵東方龍獅，淨呑對手七蛋，鄧筵霑指球隊在颱風後的狀態未及復元；但隨著多場賽事落敗，張健峰跟球員開會時說：「咁樣落去唔掂，練波都要飛沙劈石。」自此，球員練波都不再錫身，肉緊程度升級，「希望輸少啲，攞返啲甜頭。」
在大敗翌日的早上，鄧筵霑和黃浩然乘坐的士到將軍澳個足球訓練中心練波，的士司機對他們說，「哦，你哋就係輸七球嗰隊，加油呀！」鄧筵霑一臉腼腆說「有喜有悲」，「原來佢都有睇，但係係因為輸波而記得我哋。」
這幾年，香港足球面對甚麼環境，球迷自然清楚不過，有說是重回2000年初冰河時期，傑志近日則歷史性晉級亞冠淘汰賽。機會，始終是留給有準備的人。
「雖然我年紀上係𡃁仔，但始終唔可以再咁𡃁仔。」鄧筵霑喃喃自語說道，縱使他的臉上仍然一臉幼氣。「無咗半季就差好遠，取消咗更加感到珍惜。」
「我會諗如果市道好嘅話，年輕球員反而未必會有咁多機會。」在訪問中，鄧筵霑特別感謝香港U23，為年輕球員提供上陣機會，「一定會好好珍惜。」他希望來季能發揮穩定，在控制節奏上有更大進步，「落到場要嗌多啲，提場多啲。」
記者：麥馬高、周頌謙