馮允謙租水車體驗淋雨場景　不怕妝髮全甩：想做就要做

馮允謙（Jay Fung）今年第二首英文歌《Close to the Edge》MV昨晚上架，因為他一句「我想淋雨」而租水車拍攝，營造滂沱大雨照頭淋效果，豈料未拍完已水情告急。而今次Jay首次與孖生細佬Tim Fung一齊填詞，他笑言最初以為會打交，結果合作愉快。

新歌《Close to the Edge》講一段Toxic relationship（身心有害的關係），由Jay作曲，他與細佬Tim Fung攜手填詞，編曲Matthew Chow和T-Ma，監製T-Ma。第一次拍落雨戲的Jay非常興奮：「今次有好多得意事，首先就係book咗架水車，因為要扮落雨，原本睇天氣報告，以為會落雨，點知冇，所以要租水車。另一件得意事，就係拍到差唔多最後無晒水，而且最尾係高潮位，要愈來愈大雨，要諗點樣拍埋個ending。」結果用到最後一滴水，MV大功告成。

今次MV故事由Jay與導演一同創作，Jay說：「因為歌詞內容好適合落雨，我又未試過租架水車拍落雨戲，好想試被雨淋濕晒。」他透露小時候很期待落雨玩水、踩泥氹，可惜加拿大落雨時天氣太凍，不能出戶外玩水，而香港落雨天氣和暖，所以想感受一下。「我成日見到其他人拍嘅MV落大雨，成身濕晒，失落嘅感覺，未試過就好想試。我知道化妝師、髮型師和造型師都有好大concern （憂慮），髮型同埋個妝都甩晒，唔知似咩！但我唔理，我想做就要做！」任性的Jay最後如願以償。

新歌首次與孖生弟弟Tim Fung一齊填詞，Jay笑言沒有想過如此順利，他說：「因為我好有自己嘅諗法，佢又好堅持，我以為我哋會打交，估唔到合作咁愉快。其實Tim寫嘢幾叻，佢做過copywriter（撰稿人），今次搵佢幫手，希望寫到唔同嘅感覺。」Jay表示芸芸香港唱作人中，很欣賞Moon Tang寫的英文歌詞，希望有機會合作。