對Rooftop Bar有情意結嘅我，今次終於嚟到呢間位於銅鑼灣柏寧酒店27樓嘅天台酒吧。餐廳係一個可以容納百多位客人嘅場所，設有室內及室外嘅用餐區。值得一提嘅係餐廳設有空中花園，可以欣賞寧靜嘅維多利亞公園遠景之外，同時飽覽維港醉人景色。天氣好嘅時候望住個海景吹住海風，邊Chill住飲酒，真係唔錯。
12星座調酒系列亦都係餐廳嘅其中一個標誌特點。如果嚟到餐廳唔知飲啲咩好，就可以點返屬於自己嘅星座Cocktail試吓。話唔定同閨蜜喺誤打誤撞嘅情況下，會搵到一杯自己鐘意嘅星座酒☺️
小編係5月生日嘅，所以就叫咗杯Gemini試下。味道不錯，用左Grey Goose Vodka作為基酒，加入百香果果汁，頂層用左燒燒棉花糖料做裝飾。雖然味道相對地甜小小，但整體都算refreshing，值得一試。射手座通常都俾人一種好開朗同樂觀嘅感覺，鍾意冒險同挑戰。呢杯Sagittarius正正混合咗coffee同 Dewar’s 8 whisky，加上荔枝嘅清甜，味道神秘得來又好飲。白色嗰層仲做到好似Galaxy嘅感覺，影相啱晒👍🏻Staff仲推薦咗杯Leo叫我一定要試吓。一拎出嚟嘅時候會有層煙係面，打開佢會聞到淡淡嘅蘋果木香。第一啖飲落去好有衝擊，Bacardi Ocho 8令杯酒有少少辛辣之餘帶點椰子嘅香味，不妨一試。佐酒小食推介串燒拼盤，分別有六款唔同嘅串燒。當中嘅日本極級A5和牛必定要試！肉質細嫩，油脂均勻，配埋法國紅莓芥末醬，相當惹味。地址 : 銅鑼灣告士打道310號柏寧酒店27樓