金缸經｜政府保本保回報產品應抽盡抽

政府又出新一批3年期銀債，保底息4厘，老實講，老友記有能力真係建議盡抽。除咗麻煩在無二級市場，無得好似綠債咁隨時放，但有需要嘅都可以要求政府100%贖回，即係又保底又有保證利潤，政府財政雖然差，但都重有啲老本，正常情況下隻債券都唔會default嘅。

而且點解建議盡抽？除咗保本保回報，就係未來3年，有乜嘢投資保你4厘回報？而家成個世界兩大經濟體，一個全世界都估緊佢經濟衰退要開始減息，一個就好多人都擔心緊佢會出現通縮。簡單講，即係兩大經濟體經濟都唔好。

有啲專欄同KOL拎而家同2003比較，可能因為兩段時間都叫發生過疫病，因而引致香港經濟困難，無意冒犯，2003同而家係無可比性。沙士期間，全世界係得香港最大鑊，而且為期較短，唔夠一年，嗰陣中美關係唔錯，香港仍然秉持食四方飯原則，中國入世貿無耐經濟起飛，再開埋個自由行畀香港，所以喺大圍環境理想下，好快經濟復蘇；但新冠由2020年頭到2022年尾，玩咗超過兩年半，大家元氣大傷，中美關係已經麻麻，香港亦唔再係求財不求氣，同埋全球經濟都唔好，香港經濟又點會好呢？

所以見到有前輩話香港金融同樓市成日畀人唱衰，香港政府應該要成立「金融反駁隊」，真係令人驚嘆其創意。金融係一個齋講錢嘅地方，你個投資市場，無論證券定物業，只要搵到錢，就自然有錢湧入嚟，你想唱衰都阻唔到；反之亦然，大家唔覺得喺你度賺到錢，錢自然流走，你唱到幾好亦都阻唔到。連大孖沙都話要「保本保命」，市民唔做投資都係正常，只係common sense，總唔能夠因為自己睇錯市而賴呢樣賴嗰樣。

基於呢個情況，唔好話老友記，如果政府遲啲再推保回報投資產品，大家可以積極考慮。風高浪急下，有保本保回報嘅投資，真係好難搵。

金缸經

註：專欄作家言論不代表本網立場

密切留意BossMind動向！立即CLS

FB Instagram Youtube