跟「大廚」Rain炮製新式韓菜過年 黑松露海膽牛肉、酒燉鮑魚超惹味

來到農曆新年，相信大家這幾天都忙到氹氹轉，又要出門拜年，又要留家招呼親友，直頭忙過平日返工。講起招呼親友，最令人苦惱一定是「煮咩賀年菜好」，食盆菜好似冇咩新意，傳統賀年菜又食到厭，不如試下打開Netflix節目《吃貨與阿毛的逍遙遊》跟「大廚」Rain拎下靈感，煮一餐韓式賀年菜來刺激親友味蕾！

1.奶油烤鮑魚

農曆新年好多人都鍾意用海鮮來招呼朋友，奶油烤鮑魚正正是最好的選擇！煮法非常簡單，先清洗好鮑魚，放大片牛油落鑊再加入蒜蓉，最後放鮑魚炒勻，完成。

2.酒燉鮑魚

喜歡吃鮑魚的朋友，亦可以考慮炮製「酒燉鮑魚」。先清洗好鮑魚，將內臟切走蒸熟鮑魚，用攪拌機將內臟加入糖漿及豉油打勻成醬料，再將醬料落鑊加入一片牛油炒，最後沾鮑魚享用，連李孝利都食到「嘩嘩」聲。

3.螺肉辣拌麵

這個「螺肉辣拌麵」簡直是懶人之選！先煮好方便麵，將水倒走，加入泡菜、韓式辣醬調味料、麻油、罐頭螺肉加入方便麵拌勻，上碟開餐！

4.黑松露海膽牛肉

召喚食肉獸！你有曾想過在一塊肉汁豐富的厚切牛肉上面，加上一口新鮮海膽及黑松露，會為味蕾帶來多大衝擊嗎？Rain教路先在牛扒面層均勻搽上厚厚的美乃滋再煎熟，待牛肉煎到大約5成熟就加上海膽及黑松露同時享用，單看畫面都已經流口水。

5.年糕窩夫

食完豐富的正餐，當然需要些甜品來滿足「第二個胃」。這款年糕窩夫做法簡單但賣相非常得體，絕對是招呼客人的最好選擇。先在烤餅機上塗上牛油，放入韓式年糕壓扁製成窩夫，最後加上雪糕球就可，如果有黃豆粉亦可以加入享用。