MIRROR鷹小組跟「世一」學劍擊　蔡俊彥：辛苦大家睇住我個friend

MIRROR「鷹小組」陳卓賢（Ian）、柳應廷（Jer）、邱士縉（Stanley）、邱傲然（Tiger）於ViuTV《四鏡大暴走》中，跟「世一」劍擊運動員蔡俊彥（Ryan）體驗精英運動員的一日訓練，適逢MIRROR成員呂爵安（Edan）與Ryan為好友，Ryan一與四子見面馬上笑言：「辛苦晒大家，睇住我個friend咁多年。」Stanley回應：「唔好咁講啦！都辛苦㗎你都，睇咗好多年啦。」Ryan笑指：「我本來今日放假，但都要照顧咁多位。」Stanley感嘆：「世界第一放假都要陪我地！」

正式訓練前，Jer向Ryan說：「我今日懷疑Stanley可以跟到你嘅進度。」Stanley拍拍Jer膊頭：「無理由㗎喎，你咁多做gym片！」偶爾會分享做gym動態的Jer尷尬笑言：「打吓卡啫！放過我吖，哈哈！」經過一輪健身室特訓，「鷹小組」四子穿起劍擊裝備，準備好落場訓練。Ryan向四子教授幾個基本劍擊步法後，四子隨即二比二對決驗收，分組為Jer對Stanley，另一組Ian對Tiger。

二比二對決中，曾以劍擊為《無限回合》MV題材的Stanley自信十足，猛烈揮劍進攻阿Jer，Stanley指：「我一開波就係咁砰砰砰砰嚇阿Jer，跟著佢就唔知要做咩咁！」Jer笑言自己被Stanley搞到係咁縮，不過亦樂在其中，Ryan讚兩位出手動作pick up得快。而本身有運動員背景的Ian亦大展身手，頻頻向Tiger進攻，二人勢均力敵，Ian笑言：「用我多年打排球用返嚟嘅腕力，係咁打，係咁打！打到佢手腕冇力我就出手。」Ryan大讚Ian對戰Tiger的交鋒精彩：「我無諗過有啲咁嘅交鋒，以學咗一堂嚟講，算係above average！」