陳柏宇《一天》　甜蜜地唱出細水長流嘅愛

嚟到今年第六首派台作，陳柏宇帶嚟成熟溫柔嘅《一天》，甜蜜地唱出細水長流嘅愛。

「日月靜好不經不覺冷落了感受麻木到唯獨注視結果失去了溫柔」

依個城市步伐實在太急促，受生活所迫，我地總要花盡力氣追趕眼前嘅挑戰，每日筋疲力盡，難免對身邊人多咗份脾氣，少咗份溫柔。特別同愛人一齊耐咗，我地已經太習慣對方會在旁，往往忘記咗伴侶同樣有感受，忘記咗佢對你嘅愛同容忍唔係必然。

「仍在日夜共度的每天還在盡力學習怎愛得真摯」

曾經愛得多轟烈也好，一段關係要走得長久，都要回歸日常生活。學習遷就，學習付出，學習體諒，依啲係一生嘅課題。其實只要有對方陪伴，互相扶持，簡簡單單，喺專屬兩個人嘅空間，毫無顧慮地談天說地，計劃共同嘅將來，日子多平淡，都會有一份由心而發嘅幸福。

「歲月變遷減退了新鮮珍惜跟你散步談笑半天對話無底線無論或晴或雨也是始終的掛牽」

縱使人總會有疲倦同困難嘅時間，無法一下子跨過，但外間風雨多大也好，返到屋企見到愛人一個笑容，幾辛苦都變得值得。過去多苦，未來多難，依刻唔再重要，我倆快樂就足夠。

我地控制唔到世界嘅變遷，但可以珍惜與愛人相處嘅時間，好好享受每一天。執子之手，與子偕老，永遠不變。

「仍在日夜共度的每天還在盡力學習怎愛得真摯想要初衷永不變」

陳伯今年非常勤力，出咗足足六首派台歌，風格各異，首首高質。出道咁多年，依然出心出力尋求突破，不斷比新鮮感樂迷，實在係我地嘅福氣。

由《永久保存》、《沒有你，我甚麼都不是》、《霸氣情歌》到《一天》，成長路上一直有陳伯嘅甜蜜情歌陪伴，為勞碌嘅生活添上一點幸福。

「看著你歡笑留住熱情延續愛慕就算一輩子我也未變」

如果你依刻感到疲倦無力，不妨放低手上嘅事情，同另一半渡過一天，或者對人生會有點新看法🙂

《一天》陳柏宇
曲：Harry Kwan / James Wu
詞：James Wu
編：James Wu / Kudos Lam
監：Edward Chan / James Wu

「平平淡淡亦是一輩子
貧病或是禍患生活的挑戰
歲月變遷減退了新鮮
珍惜跟你散步談笑半天對話無底線
談及未來期待計畫美好的發展
再去實踐

可不可以這樣度過每天
看著你歡笑
留住熱情延續愛慕就算一輩子
我也未變」

娛樂