卡塔爾特集｜森巴魅力沒法擋

卡塔爾世界盃日記 Day5

C朗又詐詐諦博到12碼

巴西出場攞頭威

今日繼續留喺球迷村睇波，下午遇到一班沙特阿拉伯球迷喺房間外面飲土產咖啡，佢哋好熱情咁叫我哋join，我同港婦當然唔客氣。之前都介紹過嘞，Gahwa咖啡嘅精粹係好客、慷慨、分享，呢種係中東獨有嘅非物質文化遺產，香料咖啡配椰棗，風味獨特，苦與甜之間，細味到一份萍水相逢嘅情誼！國家隊首仗贏波，更令全國多一日假期，沙特人梗係高興，而佢哋今日就撐巴西咁話。據我多日以來觀察，中東球迷十居其九都係南美擁躉，唔係撐阿根廷就係撐巴西，不過上場沙特咁啱對正阿根廷，咁就當然自己人先行。

入夜上演葡萄牙對加納，C朗又詐詐諦博到12碼，擺明想搶梁朝偉飯碗！跟住千呼萬喚，巴西登場，森巴兵團嘅魅力真係唔講得笑，超多當地人專程嚟到球迷村睇大銀幕直播，現場男女老幼，多人到搵條路行下都難，空地坐得密密麻麻，兩邊亦企滿晒人，係球迷村最墟冚嘅一晚。

結果巴西不負眾望先拔頭籌，球迷慶祝梗係嘈到拆天。

森巴兵團2:0鎖定勝局，完場後，球迷當然唔會即散啦，實行開大P慶祝，大鑼大鼓，玩到攰先肯返歸，港婦都加入埋一份。

喺呢度順便同大家介紹下球迷村嘅休憩配套。外間形容到球迷村環境惡劣，其實唔係咁差，配套充足（最差嘅唔係硬件設施，係軟件service，可以九日冇人執房，即使要求咗，都係冇人嚟，而最終嚟嘅人竟著住對滿底泥沙嘅鞋踩入房，執完仲污糟過冇執）。球迷村配套設施有籃球場，圖中個外國人企喺中圈射波，連續13球穿針，嚇死寶寶。

隔籬有兩個鐵籠般嘅球場，場中間有球網，雙方踢高波對陣，相信叫做足網球。人工草地上放滿健身器械，畀人鬆下筋骨。除此之外仲有乒乓球枱、羽毛球場同小型足球場，父母睇直播之時，小朋友有地方放電，住客又可以趁空閒時間做下運動，算係唔錯。

是日賽果：

瑞士 1:0 喀麥隆

烏拉圭 0:0 南韓

葡萄牙 3:2 加納

巴西 2:0 塞爾維亞

By港佬