楊洛婷自爆舊公司曾「不斷無理咁逼整容」！唔妥協被掟入雪櫃冇工作冇收入

Dear Jane日前完成5場紅館演唱會，主音黃天翱（Tim）在舞台上不時向太太楊洛婷（Rabee'a）和女兒「示愛」。Rabee'a今日（9月29日）在IG發布多張演唱會照片，更以千字文，表示分享曾「被舊公司不斷無理咁迫我去整容，因為我唔肯妥協、唔肯就犯，所以就被人無情咁「掟入雪櫃」，結果我冇工作冇收入。當時我老公就好型咁同我講，佢會用佢嘅所有能力去照顧我。」

楊洛婷長文內容如下：「完晒5場演唱會畀我嘅感覺真係好正！！！真正令我感動嘅，並唔係啲飛一早賣晒，又或者幾乎每首歌都全場企起身一齊大合唱，而係呢四個男人尾場第二次ENCORE時所唱嘅三首PUNK ROCK！呢啲歌係我15年前同我老公啱啱開始拍拖嗰陣，我第一次聽佢哋喺台上面表演唱嘅歌，代表咗Dear Jane嘅誕生，亦都係 Dear Jane全部意義嘅所在。簡單啲講，呢啲歌就係DEAR JANE！最重要嘅係，呢三首個唔單止令我諗番起佢哋所有嘅高低起跌同埋一切嘅經歷，仲有一啲我從來都冇分享過嘅嘢，而我估計我老公都唔記得。」

「我想講嘅係，曾經有一段時間，我被舊公司不斷無理咁迫我去整容，因為我唔肯妥協、唔肯就犯，所以就被人無情咁「掟入雪櫃」，結果我冇工作冇收入。當時我老公就好型咁同我講，佢會用佢嘅所有能力去照顧我。的而且確，我老公絕對有履行佢對我嘅承諾，而幸運嘅係，我精彩嘅主持生涯亦隨即展開。呢個就係我哋愛情故事嘅開始。雖然我一直都好相信我老公，好相信Dear Jane，我甚至可能係佢哋最強大嘅粉絲。但抱歉嘅係，我都有試過喺佢哋低潮時勸過我老公面對現實🤭，甚至叫佢轉變一下佢嘅職業。宜家諗番，我好慶幸佢當時冇聽我講，我真係好佩服佢地對理想嘅堅持同毅力！」

「喺演唱會入面，Jackal提及過「每次開show都好驚冇人買飛」，其實我都同佢一樣有呢個擔心。所以多年來每次開Show我都會求神拜佛，努力叫晒身邊所有朋友買飛支持。直到今次佢哋話開演唱會撞正我坐緊月好忙，輪到我啲朋友好主動好踴躍、個個追住叫我幫手買飛，連一啲素未謀面嘅人，好似餐廳侍應、幫我整電話嘅師傅等等，都一一走來搵我買飛(我即使再忙都出盡全力幫手答謝大家)，我真心為Dear Jane感到無比嘅光榮同驕傲！我真係好愛呢四個男人！喺未來嘅日子，無論世界有幾艱難，我都會繼續support你哋，希望你哋繼續用音樂同樂迷聯繫起來，創造更多大家喜歡嘅故事! FU*K YEAH！」