政Whats噏：劉珈汶等唔到最後一刻　決定提早辭職

劉珈汶宣布聽日會正式卸下議員身份。

47名發起或參與去年民主派「35+」初選人士被控「串謀顛覆國家政權罪」，加上政府要求區議員宣誓呢兩件大事觸發泛民主派辭職潮。黃大仙區議員劉珈汶上個月話已經退出公民黨，不過就暫時留住區議員席位，話計劃喺最後一刻先辭職。不過睇嚟佢等唔切喇，宣布聽日(9日)就會正式卸下區議員身份。

劉珈汶今日(8日)喺社交網站發文，以最後一天為題，話將會喺聽日正式卸下議員身份，感激沿路遇上嘅大家，又引述歌詞話「問我初衷鏗鏘的答，不吞吐」。佢上月接受傳媒訪問時表明，離任之後唔會離開香港，會喺陣營中尋找身位繼續服務，亦有意繼續跟進原本嘅地區工作喎。東網已向劉查詢，但暫時未獲回覆。