FI專欄｜廉航唔廉，仲點同人鬥？｜人頭馬

香港經濟今年第二季好似坐過山車，氣氛急轉直下，好多公司捱唔住紛紛告急。

前陣子景樂集團全線結業，震驚全城；近日香港航空出電郵，叫員工「自願work-life balance」——講到咁好聽，實際係花式裁員新招！呢啲亂象，除咗疫情後遺症，政府嘅「神操作」都要記一功。由醫療系統到財政預算案，官員嘅腦洞同我哋呢班老百姓真係唔同維度。

香港企業最大危機，係隔籬深圳嘅赤裸裸挑戰，尤其飲食同服務業，簡直畀人KO。

你有冇試過周末call架中港車，同班friend圍威喂去深圳食飯揼骨？又有幾多朋友改喺深圳寶安機場飛出去旅行？香港航空自2006年改名後，一直係港人廉航心頭好，去東南亞、日本，平靚正，點知疫情後航空業大地震。香港航班少咗，票價貴咗；反觀大陸航空公司，短途機票平到離譜，現場upgrade加幾百蚊，埋單仲抵過香港嘅廉航。一家大細飛曼谷、峴港，搭中港車去寶安，總數都比喺香港搭飛機平，咁仲唔轉陣？

廉航賣點係平，乘客情願坐得窄啲、服務少啲，換取budget喺目的地hea下消費多啲。但而家深圳航班班次多、時間靈活，票價仲要低一截。

我身邊好多朋友出差，已經轉飛寶安，話平得嚟仲有得揀。長此落去，香港廉航嘅客流，遲早畀深圳搶晒。

雪上加霜嘅係，政府喺2025年財政預算案將機場離境稅加到200蚊，話係「增加收入1.6億，對乘客影響輕微」。喂，廉航連平嘅優勢都冇，仲點同人鬥？

財政司司長陳茂波嘅預算案，年年畀我開眼界。之前好似都話煙稅會增加庫房收入，但係結果呢？咪又係出哂事。透過增加機場離境稅黎充實庫房，壞處就係將「廉航唔廉」嘅情況推上極致。

香港經濟唔係全無希望，2025年第一季GDP增3.1%，靠出口同旅遊復蘇撑住，但內需弱到似病貓，零售額跌2.3%。

政府話推「大型活動」振興旅遊，但面對深圳嘅低成本攻勢，香港航空業同服務業真係要抖擻精神，否則輸硬。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen