【蘇跑旅遊】探遊香港秘景吊鐘洲 擺尾金魚拱門美景

吊鐘洲係香港一個島嶼，位於新界西貢區牛尾海與糧船灣海之間。吊鐘洲因海浪持續侵蝕，岩中逐漸形成好似寺廟的大鐘形狀，所以有此稱號。除此之外，長年累月被海浪侵蝕的吊鐘洲，形成海蝕洞、海岩柱及流紋岩等景觀，成為香港地質公園景點之一。

要到吊鐘洲呢個拱門秘景打卡要有長征嘅心理準備，並不如一般行山路徑咁容易。另外，島嶼比較徧遠且荒蕪，建議各位帶備足夠食水及補充食物，好好享受遠離塵囂的寧靜。

前往吊鐘洲，坐船係唯一方法。筆者選擇坐快艇前往，原本打算划獨木舟，但由於夏天係水上活動旺季，租借獨木舟早兩個月已經滿期。讀者可以比較以下前往方法：

1)坐快艇通常要5人成行，約10-15分鐘到達。由於東面拱門位海灘較淺水，船家一般停泊島上的西面，所以落船後仍要攀過山頭才能到達打卡位。路程約45分鐘，山頭有多條分支路線，可跟隨沿途絲帶前行以免迷路。

2)划獨木舟可以直接前往拱門位，無需攀山，但要划約兩小時為一程的獨木舟，來回四小時。由於路途遙遠，所以船家只租予有獨木舟教練牌的人士。

坐快艇行山到吊鐘洲的好處，就可以從高處俯瞰美麗嘅景致，拍攝到最佳金魚擺尾同吊鐘全貌。坐立於吊鐘州島西陲崖頂處，視野無阻，飽覽活躍擺尾嘅金魚。

行山約20分鐘就會見到呢個平台，係必到打卡位。要注意崖邊無欄杆阻隔，拍攝時請量力而為。

日落時份，當金黃色的陽光照射入海蝕洞內時，就會出現有如金鐘淩空倒懸的自然奇景，浪漫迷人。去到行山路線嘅尾聲，亦係最需體能及膽量挑戰，需要攀岩而落。雖然路徑設有附助設施供行山者用游繩下山，但筆者沒有此裝備，唯有徒手而落。

喺拱門中央，靜靜地欣賞大自然美景，面對住柔和陽光從海蝕洞穿過，再照到翠綠嘅海面上，閃閃發光，彷彿置身仙景一樣。即使要經歷坐船、行山、攀爬的長征，見到呢個美景，都係值得嘅。最後透過航拍，讓大家好好欣賞吊鐘洲全貌。

撰文及攝影：蘇兒（Zoe）

鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。