蔡潔直認不忿被封「Ali2.0」　「唔係好想提到佳芯個名」

蔡潔入行9年出名為戲博到盡，至今拍過不少破格作品，卻一直被指撞樣李佳芯，她最近在無綫劇集《一舞傾城》飾演夜總會王牌舞小姐終於成功入屋，蔡潔近日接受蝦頭（楊詩敏）及連詩雅主持的網台節目《絲打圍爐》訪問，剖白原來曾為事業發展感到困擾。

34歲的蔡潔2014年拍攝處女作《香港仔》出道，在戲中與曾志偉發展婚外情，全裸床戲不時都被網民翻炒，更順利入圍金像獎最佳新人獎，可惜外界卻從此把她與全裸床戲掛鉤，被主持人問到會否感到不開心，蔡潔老實表示一定有：「其實從我真係宣傳《香港仔》開始，直到過咗嗰一年之後到7、8年之後，我做宣傳訪問都會同《香港仔》有關，都係『全裸肉搏』、『總經理』呢啲字眼，其實人哋都係一個女仔嚟㗎嘛，一定會係介意同唔開心。」到後來作品慢慢增加，沖淡出道作的形象，蔡潔又被封為「「Ali2.0」，她亦坦白表示雖對對方不好意思，但的確會因而感到困擾：「我唔係好想提到佳芯個名，因為我覺得打擾到佢。近呢幾年又多咗個Tag，就係全裸肉搏完總經理之後，又『佳芯2.0』，個題連我個名都冇，你話有冇唔開心，一定會係有。」

第一部作品就有大膽演出，意外被定型，蔡潔亦不諱言會「唔忿氣」：「就算佢報你其他嘅嘢，點都會報返呢樣嘢，點講呢⋯⋯我哋作為演員好想同大家講，只係角色啫！如果我扭扭擰擰，你又會話我扭扭擰擰。當然我都明觀眾係分唔到嘅，但我就係好想去證明俾佢睇『大佬呀，我係專業㗎！』，我只係想證明呢樣嘢。」