Pandora推出專輯《BLOOM》　以新舊作品建構繁花盛開故事

Pandora喺專場前推出專輯《BLOOM》，為樂迷提前熱身，以新舊作品建構一個繁花盛開嘅故事。

「引力還未退傷口纍纍我深吸一口氣美麗和暴躁的旱雷腦海裡吹」

專輯開首用一段彷似置身大自然嘅純音樂，帶大家進入情緒，再接《反引力塵》嘅前奏勁有feel。生活有太多無法控制嘅事，難免會令人恐懼，但只要你有勇氣堅持到底，用意志力撐過，定能抗衡世上所有定律與難關。

「心中總有當年童真小孩長在每日強大我如果本性善良誰能奪去自我還愁煩什麼」

回想過去，成長過程總會受周遭環境影響，迫於無奈做一啲違背自我嘅事，好似喺不經不覺間逐漸成為一個壞人。夕爺正正以歌詞提醒我地，即使世界有甚麼事污染你，你內心深處永遠有一個善良嘅小孩。

喺一段稍為沉重嘅文字後，我諗大家都需要一個《粉紅泡泡防護罩》，讓快樂氣氛充斥腦海，將所有野想像成粉紅色，一切頓時會變得美好。

「找一片浮雲來做我可遮擋天空狠心的過錯可安撫你在向光的世上一切失望」

然而，人難免有傷春悲秋嘅時候，彷似置身黑暗，無法找到出口，但其實陰影背後定會有人陪伴你，就算依刻未有，Pandora溫柔嘅歌聲都可以擔當依個角色，為你遮風擋雨。

再者，人生說到底不過係一場遊戲，有咩煩惱都可以用《緊急應變逃生法》，輕鬆應對所有問題，只要你能夠創造一個個出口，就無解決唔到嘅事。

「別要理世界保守封建教訓與歷史就做你吧人生無下次」

與其為身邊事物而耗盡心神，倒不如珍惜青春嘅尾巴，放膽地嘗試。結果係點都唔重要，最緊要係能夠享受過程，寫下屬於自己無悔嘅故事。

人生只得一次，非常短暫，無論世界多奇怪，都要調整心態，最緊要過得快樂，活出自己嘅態度，《痛痛快快活活去》！

「當清楚我是與別不同後發現愛是種成就你在對岸我期盼還有」

漸漸步入生命下半場，面對過一次次高山低谷，或者會迷失，或者會氣餒，但只要曾經奮力對抗急流，你就會搵到自己獨特嘅價值以及存在意義。

生老病死，聚散離合，係所有生命必經嘅階段，我地無法改變命運，卻可以珍惜每寸光陰，每段緣份，讓一生過得完滿，為依場《花之生命》畫下完美句號。

「花粉吹開各有命途又聚散又散聚時代光影中只要飛舞」

順序地聽完整張專輯，好似經歷咗一段花開花落嘅旅程，有種充滿希望嘅感覺，比到力量我繼續面對眼前嘅挑戰。依隻碟亦為Pandora近兩年嘅音樂歷程寫下一個小總結。轉眼間專場在即，好期待可以再次感受Pandora現場嘅感染力！

「什麼都好切記愉快」

《BLOOM》 Pandora
1 《Bloom》
2 《反引力塵》
3 《善良之歌》
4 《粉紅泡泡防護罩》
5 《我以陰影擁抱你》
6 《緊急應變逃生法》
7 《年輕小說家》
8 《痛痛快快活活去》
9 《海裡海裡去》
10 《花之生命》

娛樂